"კაუკაზუს ენერჯი ენდ ინფრასთრაქჩამ" 2010 წლის შედეგები გამოაქვეყნა, რომლის მიხედვითაც ირკვევა, რომ აღნიშნულ პერიოდში კომპანიის შემოსავალი 438 ათას ლარამდე (246000 აშშ დოლარი) გაიზარდა მაშინ, როდესაც 2009 წელს შემოსავალი 19 ათას ლარს გაუტოლდა.
EBITDA-მ -235 ათას ლარამდე დაიკლო (-132000 აშშ დოლარი), ხოლო წმინდა მოგებამ 757 ათას ლარი (425000 აშშ დოლარი) შეადგინა. კომპანიის განცხადებით, ჰიდროელექტროსადგურის სამშენებლო მოედნის ზემო ნაწილზე კოფერდამის მშენებლობა დაიწყო, რაც კაშხლის ასაშენებლად მშრალ გარემოს უზრუნველყოფს.
"კაუკაზუს ენერჯი ენდ ინფრასთრაქჩამ" აგრეთვე წინასწარი ხელშეკრულება გააფორმა Herrenknecht-თან, რომელიც კომპანიას მოამარაგებს ახალი „tunnel boring machine (TBM)"-ით. აღსანიშნავია, რომ ამჟამად გვირაბის ბურღვის სამუშაოები დროებით შეჩერებულია სანამ კომპანია ახალ TBM-ს მიიღებს.
შეგახსენებთ, "კაუკაზუს ენერჯი ენდ ინფრასთრაქჩა (CEI) წარმოადგენს სააქციო საზოგადოებას, რომელიც შექმნილია საქართველოს მოქმედი კანონმდებლობის თანახმად. წესდების მიხედვით CEI-ს შეუძლია განახორციელოს ინვესტირება ტრანსკავკასიურ კომპანიებში, რომელთა საქმიანობის ძირითად სფეროს წარმოადგენს ელექტროენერგიის და ბუნებრივი აირის წარმოება.
2008 წლის თებერვალში, CEI-მ აქციების პირველადი საჯარო განთავსების გზით მოიზიდა 50 მილიონი ამერიკული დოლარი, რომელიც შეადგენს საქართველოს მთლიანი შიდა პროდუქტის 0.5%-ს და წარმოადგენს საქართველოში ყველაზე დიდ საჯარო განთავსებას (IPO).
2009 წლის მესამე კვარტალში, CEI-მ მოიპოვა ახალციხის რაიონში, მდინარე მტკვარზე (თურქეთის საზღვართან), 46.4 მვ სიმძლავრის ჰიდროელექტრო სადგური „მტკვარის" მშენებლობის და ოპერირების ლიცენზია. ჰიდროელექტროსადგური „მტკვარის" პროექტის განხორციელების მიზნით, CEI-მ დაარსა შპს „მტკვარი ჰესი". პროექტის სამშენებლო სამუშაოები დაიწყო 2009 წლის ნოემბერში და დღესაც გრძელდება. მშენებლობის დასრულება გათვალისწინებულია 2013 წლისთვის.
CEI-ი წარმოადგენს ერთადერთ კომპანიას საქართველოს საფონდო ბირჟაზე რომლის მეშვეობითაც ინვესტორებს შეუძლიათ დააბანდონ კაპიტალი საქართველოს ენერგეტიკის სფეროში. საქართველოს საფონდო ბირჟაზე, CEI-ის აქციებით ვაჭრობა ხორციელდება ტიკერით NRGY. 2008 წლის მარტში, CEI-მ დანიშნა Bank of New York კომპანიის გლობალური სადეპოზიტარო ხელწერილების (GDR) პროგრამის სადეპოზიტარო ბანკად. ერთი GDR უდრის ათ ლოკალურ აქციას. კომპანია განიხილავს GDR-ების განთავსების საკითხს ერთ-ერთ წამყვან ევროპულ საფონდო ბირჟაზე.