"ქრისტიან-დემოკრატები" მოითხოვენ, ხელისუფლებამ მთელი საქართველოს მასშტაბით მხოლოდ თბილისელი პენსიონრებისთვის წინასაარჩევნო მიზნებით მიცემული 10-ლარიანი დანამატი დაფაროს.
როგორც "ქრისტიან-დემოკრატების" წევრი ინგა გრიგოლია აცხადებს, ეს თანხა ცენტრალური ბიუჯეტიდან უნდა დაიფაროს. ამ შემთხვევაში, თბილისის ბიუჯეტს ყოველწლიურად 34 მილიონი ლარი დაეზოგება.
"ხელისუფლება აცხადებს, რომ მთელი საქართველოს მოსახლეობა თანაბარ პირობებში უნდა ჩააყენოს და მათაც 10-ლარიან დანამატს მისცემენ. ჩვენი სურვილია, ხელისუფლებამ 10-ლარიანი დანამატი ცენტრალური ბიუჯეტიდან დაფაროს. ამ შემთხვევაში, თბილისის ბიუჯეტს 34 მილიონი ლარი დაეზოგება, რაც "ქრისტიან-დემოკრატების" ინიციატივით, ჯანდაცვის პროგრამებისკენ იქნება მიმართული.
გრიგოლიას თქმით, ოთხშაბათს დანიშნულ საკრებულოს სხდომაზე იგი ამ ინიციატივით მიმართავს საკრებულოს წევრებს.
ამასთან, "ქრისტიან-დემოკრატები" სექტემბრიდან პენსიის 100 ლარამდე გაზრდას მიესალმებიან და აცხადებენ, რომ ხელისუფლებამ მათი ერთ-ერთი მთავარი მოთხოვნა გაიზიარა.
"ჩვენი ერთ-ერთი მთავარი მოთხოვნა იყო, 100 დოლარამდე თუ არა, მინიმუმამდე მაინც გაზრდილიყო პენსიები, რაც მიხეილ სააკაშვილის მთავარი საპრეზიდენტო დაპირებაც იყო. თუმცა კარგია, რომ ხელისუფლებამ ჩვენი მოთხოვნა დააკმაყოფილა და პარლამენტში პენსიებთან დაკავშირებით ცვლილებები შევიდა", _ აცხადებს გრიგოლია.
"ქრისტიან-დემოკრატების" მოთხოვნას საკრებულოს უმრავლესობის წევრი კახა გურული გამოეხმაურა. მისი თქმით, დედაქალაქელი პენსიონრებისთვის პენსიის 10 ლარით გაზრდა გასულ წელს საკრებულოსა და მერიის ინიციატივით მოხდა, რაც საქართველოს პრეზიდენტის მოთხოვნას შეესაბამებოდა.
მისი თქმით, ყველა გამოთავისუფლებული თანხა ისედაც ჯანდაცვის პროგრამებისკენ იყო მიმართული, რაც მომავალშიც გაგრძელდება.
