ჩინელი ინვესტორები საქართველოში მსხვილი პროექტების განხორციელებით დაინტერესდნენ. ეკონომიკისა და მდგრადი განვითარების სამინისტროს ინფორმაციით, ჩინური დელეგაცია თბილისს ერთ კვირაში ეწვევა და მოლაპარაკებებს მთავრობის წარმომადგენლებთან გამართავს. სოფლის მეურნეობის, ენერგეტიკის და კომუნიკაციის სფეროში მომუშავე კომპანიების ხელმძღვანელებს ჩინეთში საქართველოს ეკონომიკისა და მდგრადი განვითარების მინისტრის პირველი მოადგილე არჩილ კეკელია შეხვდა, რომელმაც ბიზნესმენებს საქართველოს საინვესტიციო პოტენციალი გააცნო და კონკრეტული პროექტები წარუდგინა. მინისტრის პირველმა მოადგილემ ინვესტორებს საქართველოში კორუფციის დაბალი დონის და ლიბერალური საგადასახადო სისტემის შესახებ ინფორმაცია მიაწოდა, რამაც ბიზნესმენთა კიდევ უფრო მეტი დაინტერესება გამოიწვია. ეკონომიკისა და მდგრადი განვითარების სამინისტროში აცხადებენ, რომ ჩინელი ინვესტორები ენერგეტიკის, სოფლის მეურნეობის, ფარმაცევტიკის, ტრანსპორტისა და კომუნიკაციის სფეროებით ინტერესდებიან. ახლო მომავალში ისინი საქართველოში ათეულობით მილიონის ინვესტიციას ჩადებენ, იგეგმება ელექტრომოწყობილობებისა და სამედიცინო ინვენტარის მწარმოებელი ქარხნების მშენებლობა.
მასალის გამოყენების პირობები