14-16 აპრილს საქართველო კავკასიის საერთაშორისო ტურისტულ გამოფენა "EXPO 2011"-ს უმასპინძლებს. ტურიზმის ეროვნული სააგენტოს ინფორმაციით, გამოფენას 14 აპრილს 11:00 საათზე ეკონომიკისა და მდგრადი განვითარების მინისტრი ვერა ქობალია და ტურიზმის ეროვნული სააგენტოს თავმჯდომარე მაია სიდამონიძე გახსნის.
EXPO 2011-ზე წარმოდგენილი იქნებიან 5 ქვეყნიდან (თურქეთი, პოლონეთი, Aაზერბაიჯანი, ბელორუსია, უკრაინა), ქართული შემომყვანი ტუროპერატორები, სასტუმროები, პეგასუსისა და ყაზახეთის ავიახაზები, სხვადასხვა სახის მომსახურიბის კერძო კომპანიები და ასევე საკუთარი სტენდებით წარმოდგენილი იქნებიან მცხეთა-მთიანეთის, შიდა ქართლის, კახეთის, რაჭა-ლეჩხუმისა და სამცხე-ჯავახეთის რეგიონებიდან.
გამოფენა 3 დღეს გასტანს, დაგეგმილია სხვადასხვა აქტივობები: ტურიზმის ეროვნული სააგენტოს პრეზენტაცია, ინფო-ტურის მონაწილეთა და ქართველ ტურ-ოპერატორთა B2B შეხვედრები, სასწავლო სესიები სტუდენტებისათვის, ფოტოგამოფენა, ქართული სუვენირების გამოფენა-გაყიდვა.
სააგენტოს ინფორმაციით,კავკასიის საერთაშორისო ტურისტული გამოფენის ფარგლებში ეკონომიკისა და მდგრადი განვითარების მინისტრი ვერა ქობალია მასპინძლობს "სუამის" ქვეყნების მინისტერიალს, სადაც სუამის წევრი ქვეყნების გარდა მონაწილეობას თურქეთისა და ბელორუსიის ტურიზმის მინისტრები მიიღებენ. სტუმრები დაესწრებიან გამოფენის გახსნას, დაათვალიერებენ სტენდებს რის შემდეგაც 14:30 საათზე სასტუმრო "მერიოტში" გაიმართება მინისტერიალის შეხვედრა რომელსაც ეკონომიკის მინისტრთან ერთად ტურიზმის ეროვნული სააგენტოს თავმჯდომარე მაია სიდამონიძე დაესწრება და განხილული იქნება სამომავლო თანამშრომლობის პერსპექტივები.
აღნიშნული გამოფენა წელს ვიზიტორებს ბევრ გასართობ აქტივობებსაც სთავაზობს. დაგეგმილია ღამის შოუს ბენდის კონცერტი, თითების თეატრის წარმოდგენები, სტუმრებს შესაძლებლობა ექნებათ დააგემოვნონ ქართული ღვინო და ყველი, დაგეგმონ თავიანთი მოგზაურობა საქართველოს საუკეთესო ტურისტულ ადგილებზე, გაიგონ რა სახის ტურისტულ მარშრუტებს სთავაზობენ ტურისტული სააგენტოები მსოფლიოს სხვადასხვა მიმართულებით, გაეცნონ და შეიძინონ ქართული უნიკალური ხელნაკეთი სუვენირები, გაერთონ და ისიამოვნონ ქართული მუსიკითა და გასართობი შოუებით. ასევე გათამაშებით მოიგონ 2 კაციანი საგზური საქართველოს კურორტებზე.
მასალის გამოყენების პირობები
