რუსეთის ხელისუფლება სოჭის 2014 წლის ოლიმპიადისთვის გაგრის მიმდებარე ტერიტორიაზე "პატარა ლასვეგასის" მოწყობას გეგმავს.
ამის შესახებ "ჯი-ეიჩ-ენს" პარლამენტის სპორტისა და ახალგაზრდულ საქმეთა კომიტეტის თავმჯდომარემ გიორგი ასანიძემ განუცხადა.
"ჩვენ გვაქვს ინფორმაცია, რომ გაგრის მიმდებარე ტერიტორიაზე, კერძოდ კი საუბარია 160 კვ.კილომეტრზე რუსეთის ფედერაცია სოჭის ოლიმპიადისთვის კაზინოების, გასართობ ცენტრებს და სასტუმროების მშენებლობას გეგმავს, რაც ოლიმპიურ ქარტიას ეწინააღმდეგება", - აღნიშნა ასანიძემ.
მისივე თქმით, აღნიშნულთან დაკავშირებით, ქართული მხარე საერთაშორისო ოლიმპიურ კომიტეტს მიმართავს და მოითხოვს ოკუპანტი ქვეყნის მიერ ოკუპირებულ ტერიტორიებზე, როგორც უკანონო მშენებლობების, ასევე აფხაზეთის ტერიტორიიდან ინერტული მასალის გატანის შეწყვეტას.
"თუ ოლიმპიური თამაშები გადაიქცა პოლიტიკურ პლაცდარმად, ასეთ შემთხვევაში მას ჩაშლა ემუქრება", - აღნიშნა მან.
