ფლორიდის შტატის პროტესტანტული ეკლესიის მღვდელი ტერი ჯონსი, რომელმაც 20 მარტს დემონსტრატულად დაწვა ყურანი, 1 აპრილს ფანატთა მიერ რელიგიურ ნიადაგზე მომხდარ ხოცვაში თავს დამნაშავედ არ მიიჩნევს.
უკანასკნელი ცნობით, ავღანეთში, მაზარი-შარიფში გაეროს შენობაზე თავდასხმისას გაეროს მისიის შვიდი თანამშრომელი დაიღუპა: სამი სამოქალაქო და ოთხი სამხედრო მოსამსახურე.
ექსცესებში ასობით ადამიანი მონაწილეობდა.
"არ მივიჩნევთ, რომ მომხდარის გამო პასუხისმგებლობა უნდა ავიღოთ", - განაცხადა ჯონსმა ტელეკომპანია"ეი-ბი-სი"-სთვის მიცემულ ინტერვიუში. მივიჩნევთ, რომ რადიკალური ისლამის მომხრეებმა მომხდარი მხოლოდ საბაბად გამოიყენეს. ჩვენ რომ არ ვყოფილიყავით, ისინი სხვა საბაბს მოძებნიდნენ".
გასული წლის სექტემბერში ჯონსმა ყურანის საჯაროდ დაწვა გადაწყვიტა. მას სურდა, ეს აქცია აშშ-ზე ტერორისტული აქტის წლისთავისთვის დაემთხვია.
თუმცა საზოგადოებრივი წინააღმდეგობის შემდეგ მან საკუთარი განზრახვის განხორციელებისგან თავი შეიკავა. 12 დღის წინ კი მან ერთი მღვდლის დახმარებით, მუსულმანთა წმინდა წიგნი მაინც დაწვა.
