სილვიო ბერლუსკონი აფრიკიდან ჩასული მიგრანტების მთელ ევროკავშირში გადანაწილების წინადადებით გამოდის.
იტალიის პრემიერმა უკვე მოუწოდა ევროკავშირს, ჩრდილოეთ აფრიკიდან გამოსული დევნილებისთვის დროებითი ნებართვები გასცეს, რითაც მათ ევროკავშირის ტერიტორიაზე გადადგილება შეეძლებათ.
ამასთან, იტალიის მთავრობის მეთაურმა კრიტიკით მოიხსენია იტალიის მეზობლად მდებარე ქვეყნები, რომლებიც იტალიელებს მიგრანთა ნაკადის მატების დროს დახმარებას არ უწევენ.
მარტში იტალიის კუნძულ ლამპედუზაზე 20 ათასამდე ადამიანი ჩავიდა, რომელთა უმრავლესობაც ტუნისიდან და ლიბიიდან იყო. იტალიის ხელისუფლებამ განაცხადა, რომ კუნძულის ინფრასტრუქტურა ვერ გაუძლებდა ამდენი მიგრანტის მოზღვავებას.
უფრო ადრე იტალიელებმა საგანგებო მდგომარეობა გამოაცხადეს და ევროკავშირს დახმარების თხოვნით მიმართეს, თუმცა მათი თხოვნა უპასუხოდ დარჩა. უფრო მეტიც, გერმანიის ხელისუფლება მიიჩნევს, რომ დევნილების პრობლემა იტალიამ დამოუკიდებლად უნდა გადაწყვიტოს.
