თბილისის საკრებულოს დამოუკიდებელი დეპუტატი თინათინ ხიდაშელი დედაქალაქის ხელისუფლებისგან ქალაქის ტერიტორიაზე არსებული მძიმე მდგომარეობაში მყოფი ყველა საბავშვო ბაღის სარემონტო სამუშაოს დაუყოვნებლივ დაწყებას ითხოვს.
როგორც ხიდაშელმა სოფელ გლდანში გამართულ ბრიფინგზე აღნიშნა, სიღარიბის ზღვარს ქვემოთ მყოფი ოჯახების 7 ათასამდე ბავშვი წელს იმ მიზეზით დარჩა გარეთ, რომ თბილისში საკმარისი მუნიციპალური ბაღი არ არსებობს.
"საკმარისი დროა დარჩენილი იმისათვის, რომ ყველა საბავშვო ბაღის შენობას სრული რეაბილიტაცია ჩაუტარდეს, შეძენილ იქნას საჭირო ინვენტარი, შეირჩეს აღმზრდელები და პედაგოგები, რათა სექტემბრიდან ყველა სკოლამდელი აღზრდის დაწესებულებაში სასწავლო პროგრამა აღდგეს და ყველა მსურველი დაკმაყოფილდეს", - განაცხადა ხიდაშელმა.
ხიდაშელის განცხადებას საკრებულოს უმრავლესობის ერთ-ერთი ლიდერი კოკი იონათამიშვილი გამოეხმაურა. მისი თქმით, ბაღებზე მოთხოვნილება დღითიდღე მატულობს და დღეისათვის ბავშვთა რაოდენაობა 45 ათას აღწევს.
იონათამიშვილის აზრით, საბავშვო ბაღებით, პირველ რიგში, სოციალურად დაუცველი ოჯახების შვილების დაკმაყოფილდება.
"სტატისტიკის მიხედვით, 7 ათასამდე ამ კატეგორიის ბავშვი ვერ მოხვდა სკოლამდელ დაწესებულებაში, რაც ასეთ ოჯახებს დიდ პრობლემას უქმნის",_აცხადებს იონათამიშვილი.
მისი თქმით, უახლოეს მომავალში მერიამ საკრებულოს წევრებს გარკვეული გეგმა უნდა წარუდგინოს, რომელიც დაარეგულირებს სოციალურად დაუცველი ოჯახების ბავშვების საბავშვო ბაღებში მიღებას.
დეპუტატი სოფელ გლდანის მოსახლეობის პრობლემასაც შეეხო და აღნიშნა, რომ აქაურ მცხოვრებლებს საშუალება აქვთ, ბავშვები გლდანულაში მდებარე ბაღებში ატარონ.
