4 აპრილს, ტურიზმის ეროვნული სააგენტოს ინიციატივითა და ორგანიზებით, ქუთაისის ცენტრში გაიხსნება ტურიზმის საინფორმაციო ცენტრი, რომელიც ჩასულ დამსვენებლებს მიაწვდის ინფორმაციას გადაადგილების, განთავსების და კვების ობიექტების შესახებ და სხვადასხვა სახის სერვისსა და საექსკურსიო მომსახურებას შესთავაზებს.
ქუთაისს სტრატეგიული ადგილმდებარეობა აქვს - ახლოს არის როგორც ზღვის, ასევე მთის კურორტებთან. ქუთაისში არის "იუნესკოს" 2 ძეგლი, იქვეა "პრომეთესა" და "სათაფლიის" მღვიმეები, ვანის არქეოლოგიური გათხრები. ქუთაისი ხდება ღამისთევის ქალაქი, რაც საშუალებას იძლევა ჩაერთოს ერთდღიან ტურისტულ მარშრუტში - ზღვაზე დასვენების მსურველებისთვის ქუთაისი შეიძლება გახდეს დამატებითი შეთავაზება.
ქუთაისის ვიზიტორების გაზრდას საგრძნობლად შეუწყობს ხელს კოპიტნარის აეროპორტის რეაბილიტაცია, რაც მას საერთაშორისო რეისების მიღების საშუალებას მისცემს. 2010 წელს ქუთაისში 64 000 ვიზიტორი იყო, მათი რაოდენობა 30% გაიზარდა.
ქუთაისის ტურიზმის საინფორმაციო ცენტრს ტურიზმის ეროვნული სააგენტოს თავმჯდომარე მაია სიდამონიძე და იმერეთის გუბერნატორი ლაშა მაქაცარია გახსნიან.
ტურიზმის ეროვნული სააგენტო აგრძელებს მუშაობას ტურიზმის საინფორმაციო ცენტრების ერთიანი ქსელის შექმნაზე, უკვე გაიხსნა სიღნაღის, ყვარლის, მესტიის საინფორმაციო ცენტრები. უახლოეს მომავალში ტურისტული ცენტრები გაიხსნება მცხეთაში, გორში, თბილისის საერთაშორისო აეროპორტში, ბათუმში, ზუგდიდსა და ანაკლიაში.
