აჭარის მთავრობის თავმჯდომარემ, ლევან ვარშალომიძემ, აჭარის სოფლის მეურნეობის მინისტრ დონარა სურმანიძესთან ერთად, საჩინოში მოქმედი მეცხოველეობის ფერმა "ნუსრეთ ჯორჯია'' დაათვალიერა.
შპს "ნუსრეთ ჯორჯია" 2010 წელს დაარსდა. კომპანიის საქმიანობის ძირითადი მიმართულებაა მეცხოველეობის განვითარება და საქონლის ხორცის წარმოება.
კომპანიის მიერ 2010 წელს ქობულეთის მუნიციპალიტეტის სოფელ საჩინოში შესყიდული იქნა ყოფილი მეცხოველეობის ფერმა, რომელსაც ჩაუტარდა კაპიტალური რემონტი, აღდგენილი იქნა მეცხოველეობის ფერმის შენობა და დამხმარე ნაგებობები. შესყიდული იქნა კომბინირებული საკვების დამამზადებელი აგრეგატი. 2011 წლის დასაწყისში კომპანიის მიერ ახალციხიდან შემოყვანილი იქნა 120 სული მეხორცული მიმართულების მსხვილფეხა რქოსანი პირუტყვი.
ფერმაში მოწყობილია მარტივი ტიპის სასაკლაო, რომლის წარმადობა შეადგენს - 10 ტონა ხორცს დღეღამეში.
წარმოებული ხორცის რეალიზაციის მიზნით, მიმდინარე წლის თებერვალში შპს "ნუსრეთ ჯორჯიამ" ქ. ბათუმში, ჭავჭავაძის 46 ნომერში აამოქმედა ხორცის მაღაზია, სადაც მომხმარებელს შეუძლია შეიძინოს სხვადასხვა დაფასოების საქონლის ხორცი.
სულ კომპანიის მიერ განხორციელებულია 500 ათასი ლარის ინვესტიცია. კომპანიაში ამ ეტაპზე დასაქმებულია 7 ადამიანი, აქედან 4 ფერმაში, ხოლო 3 მაღაზიაში. კომპანიას მიმდინარე წელს დაგეგმილი აქვს დამატებით 130 სული პირუტყვის შემოყვანა.
