"ქრისტიან-დემოკრატები" მეორე ჯგუფის ინვალიდებისთვის და მარჩენალდაკარგულებისთვის პენსიის მომატებას ითხოვენ.
აღნიშნული საკითხი "ქრისტიან-დემოკრატების" წევრმა მაგადა ანიკაშვილმა ფინანსთა მინისტრის მოადგილე პაპუნა პეტრიაშვილთან შეხვედრაზე განაცხადა, რომელზედაც მიმდინარე წლის ბიუჯეტში ცვლილებების პროექტი განიხილეს.
ანიკაშვილის შეფასებით, მას შემდეგ, რაც ასაკის პენსიონერებისთვის და პირველი ჯგუფის ინვალიდებისთვის პენსია 100 ლარამდე გაიზრდება, მათსა და დანარჩენ კატეგორიების პენსიებს შორის, დიდი სხვაობა ჩნდება, რაც არასამართლიანია.
"ქრისტიან-დემოკრატები" ითხოვენ, მეორე ჯგუფის ინვალიდებსაც და მარჩენალდაკარგულებსაც, პენსია გარკვეული ოდენობით გაეზარდოთ.
პეტრიაშვილმა განმარტა, რომ მეორე და მესამე ჯგუფის ინვალიდები ერთნაირ პენსიას იღებენ და ძნელი ასახსნელი იქნება, მეორე ჯგუფის ინვალიდების პენსიის მომატების შემთხვევაში დანარჩენებს რატომ ეუბნება სახელმწიფო უარს.
შეგახსენებთ, რომ 2011 წლის ბიუჯეტში ცვლილებების პროექტით, საპენსიო მუხლს 55 მილიონი ლარი ემატება, რაც ასაკით პენსიონერებისა და პირველი ჯგუფის ინვალიდებისთვის 1-ლი სექტემბრიდან პენსიის 100 ლარამდე გაზრდას მოხმარდება.
საქართველოში სულ 664 ათასი ასაკით პენსიონერია, ხოლო პირველი ჯგუფის ინვალიდი - 26 ათასი, მეორე და მესამე ჯგუფის ინვალიდების საერთო ოდენობა კი ჯამში 114 ათასია.
