აშშ-ის ფედერალური სარეზერვო სისტემა უნებურად ლიბიის ლიდერ მუამარ კადაფის სპონსორი აღმოჩნდა. "ბლუმბერგის" მიერ გამოქვეყნებულ საუწყებო ანგარიშში ნათქვამია, რომ 2008 წლის ოქტომბრიდან დაწყებული, Arab Banking Corporation (ABC)-ის ნიუ-იორკის ოფისმა, რომელიც ნაწილობრივ ეკუთვნოდა ლიბიის ხელისუფლებას, აშშ-ის ფედერალური სარეზერვო სისტემისგან 70 კრედიტზე მეტი მიიღო.
აშშ-ის ფედერალური სარეზერვო სისტემის სესხის მთლიანმა მოცულობამ 2008-2010 წლებში 35 მილიარდი დოლარი შეადგინა. ამ დროისთვის ლიბიის ხელისუფლებას Arab Banking Corporation-ის აქციატა 29% ეკუთვნოდა.
ფრანც-პრესის ინფორმაციით, ნასესხები თანხა 2010 წლის მარტამდე, ანუ ლიბიაში სამოქალაქო ომის დაწყებამდე ერთი წლით ადრე გაიცემოდა. აღსანიშნავია, რომ Arab Banking Corporation (ABC)-ის შტაბ-ბინა ბაჰრეინში მდებარეობს. ამდენად, იგი გადაურჩა ლიბიის ფინანსური ინსტიტუტების წინააღმდეგ თებერვლის ბოლოს აშშ-ის მიერ დაწესებულ სანქციებს.
შეგახსენებთ, ორშაბათს აშშ-ის პრეზიდენტმა ბარაკ ობამამ აღნიშნა, რომ ვაშინგტონი ლიბიის გაყინული ანგარიშებიდან 33 მილიარდ დოლარს "შეინარჩუნებდა", რასაც მოგვიანებით ამ ჩრდილოაფრიკული ქვეყნის აღდგენას მოახმარდა.
