მიუხედავად სამინისტროს მიერ გადადგმული ქმედითი ნაბიჯებისა, დევნილთა დიდი ნაწილი კვლავ მძიმე პირობებში ცხოვრობს. ამის შესაებ სახალხო დამცველის 2010 წლის ანგარიშშია ნათქვამი.
ანგარიშის მიხედვით, განსაკუთრებით მძიმეა 1990-იანი წლების დევნილების მდგომარეობა. "მათი უმრავლესობა წლებია მძიმე პირობებში ცხოვრობს. კოლექტიური ცენტრების დიდი ნაწილი ამორტიზებულია და არ აკმაყოფილებს ადეკვატური ცხოვრებისთვის საჭირო მინიმალურ მოთხოვნებს", - აღნიშნულია ანგარიშში.
სახალხო დამცველი მიიჩნევს, რომ რეგიონების მიხედვით კოლექტიურ ცენტრებში მცხოვრები დევნილების საცხოვრებელი პირობები განსხვავებულია. "ცხადია, უკეთესი მდგომარეობაა იმ ცენტრებში, რომელთაც რეაბილიტაციის პროცესი შეეხოთ, თუმცა რიგ შემთხვევაში ძალიან მძიმეა ვითარება იმ კოლექტიურ ცენტრებში, რომელთა ბედიც ჯერ კიდევ არ არის გადაწყვეტილი. განსხვავდება ე.წ "ძველი" და "ახალი" ნაკადის დევნილების მდგომარეობაც. შესაბამისად სხვადასხვა ტიპის პრობლემები იკვეთება", - წერია ანგარიშში.
კითხვაზე, აკმაყოფილებს თუ არა თქვენი საცხოვრებელი პირობები მინიმალური მოთხოვნებს, დადებითად 47 %-მა უპასუხა, უარყოფითად 49-მა, ხოლო კითხვა უპასუხოდ სამმა პროცენტმა დატოვა.
ანგარიშის მიხედვით, აჭარის მასშტაბით ჩატარებულმა მონიტორინგმა ცხადყო, რომ საცხოვრებელი პირობების მხრივ მდგომარეობა რეგიონში დამაკმაყოფილებელია.
"საცხოვრებელი პირობები მძიმეა იმ შენობებში, სადაც სარეაბილიტაციო სამუშაო
არ ჩატარებულა.", - წერს სახალხო დამცველი.
2010 წლის ანგარიშის თანახმად, სამეგრელოს რეგიონში მცხოვრები დევნილების უმეტესობა საცხოვრებელი პირობებით უკმაყოფილოა.
"ზოგადად სამეგრელოს რეგიონში არსებული კოლექტიური ჩასახლების ობიექტების მდგომარეობა განსაკუთრებული სიმძიმით გამოირჩევა. კოლექტიური ცენტრების უმრავლესობაში სადაც მონიტორინგი ჩატარდა მოუწესრიგებელია საკანალიზაციო და წყალგაყვანილობის სისტემა. როგორც წესი ობიექტების უმრავლესობაში სახურავიდან ჩადის წყალი, რაც აჩენს ნესტს საცხოვრებელ სახლებში და ქმნის ცხოვრებისთვის არაადეკვატურ პირობებს. დევნილების უმეტესობას არ აქვს ინდივიდუალური სამზარეულო და სველი წერტილები. აღნიშნული კი ქმნის ანტისანიტარიის საფრთხეს", -აღნიშნულია ანგარიშში.
რაც შეეხება იმერეთის რეგიონს. სახალხო დამცველი მიიჩნევს, რომ იმერეთის რეგიონში ხშირია ისეთი ობიექტები, სადაც მწვავედ დგას ჰიგიენისა და ანტისანიტარიის პრობლემა.
"თბილისის ტერიტორიაზე მცხოვრები დევნილების საცხოვრებელი პირობები
განსხვავდება ცალკეული ცენტრების მიხედვით. არის კოლექტიური ცენტრები,
სადაც საცხოვრებელი პირობების საკმაოდ კარგია, თუმცა უნდა აღინიშნოს, რომ რიგ
ცენტრებში მდგომარეობა შეიძლება შეფასდეს როგორც გაუსაძლისი ან უკიდურესად
მძიმე", - ასე აღწერს დევნილთა თბილისის საცხოვრებელ პირობებს სახალხო დამცველი.