ებრაელი ბიზნესმენების ისრაელში შესაძლო ექსტრადაციის საკითხი ამ ეტაპზე არ დგას.
ამის შესახებ "ჯი-ეიჩ-ენს"ბიზნესმენების, რონი ფუქსისა და ზეევ ფრენკელის ადვოკატმა არჩილ კბილაშვილმა განუცხადა.
მისივე განმარტებით, ექსტრადაციის საკითხი ნებისმიერ დაინტერესებულ მხარეს შეუძლია დააყენოს და არ არის გამორიცხული, რომ ეს თავად მსჯავრდებულებმა მოითხოვოს.
"თუმცა ამ ეტაპზე ექსტრადაციის საკითხის დაყენება არ განიხილება, ვინაიდან ეს შესაძლებელია მხოლოდ მას შემდეგ, , რაც სასამართლო განხილვა საბოლოოდ დასრულდება. ჯერ კი, მხოლოდ პირველი ინსტანციის სასამართლომ გამოიტანა განაჩენი", - აღნიშნა ადვოკატმა.
აღნიშნულ კონტექსტში, კბილაშვილმა განმარტა, რომ ის თბილისის საქალაქო სასამართლოს მიერ დღეს გამოტანილ განაჩენს "დიდი ალბათობით" გაასაჩივრებს.
"ჯერჯერობით განაჩენის ტექსტს სრულად არ გავცნობივარ, ამიტომაც ძნელია წაუკითხავი დოკუმენტი გააკრიტიკო, თუმცა დიდი ალბათობით, არ დავეთანხმებით სასამართლოს იმ არგუმენტაციას, რის გამოც ჩემი დაცვის ქვეშ მყოფ ისრაელის მოქალაქეებს პატიმრობა შეეფარდათ", - განმარტა არჩილ კბილაშვილმა.
ბიზნესმენები რონი ფუქსი და ზეევ ფრენკელი ამ დროისთვის მე-8 საპყრობილეში არიან გადაყვანილები. სად მოიხდიან ისინი სასჯელს, ამას სასჯელთაღსრულების სამინისტრო გადაწყვეტს.
შეგახსენებთ, რომ თბილისის საქალაქო სასამართლომ ისრაელის მოქალაქეებს, ბიზნესმენებს რონი ფუქსსა და ზეევ ფრენკელს პატიმრობა შეუფარდა. სასამართლოს მიერ რამდენიმე წუთის წინ გაცხადებული ოფიციალური გადაწყვეტილების საფუძველზე, ფუქსს პატიმრობის ვადად 7 წელი, ფრენკელს კი 6 წელი განესაზღვრათ. გარდა ამისა, როგორც "ჯი-ეიჩ-ენს" საქალაქო სასამართლოში განუცხადეს, ორივე მსჯავრდებულს ფულადი ჯარიმის გადახდაც მოუწევს - ფრენკელს 100 ათასი ლარის, ფუქსს კი 500 ათასი ლარის ოდენობით. ბიზნესმენები დამნაშავედ სისხლის სამართლის კოდექსის 339-ე მუხლის მე-3 ნაწილში გამოცხადდნენ, რაც სახელმწიფო მოხელისთვის ქრთამის მიცემას ითვალისწინებს. როგორც ცნობილია, შეგახსენებთ, რომ ბიზნესმენები რონი ფუქსი და ზეევ ფრენკელი ბათუმში, გასული წლის 14 ოქტომბერს დააკავეს. ბიზნესმენებს მაღალი თანამდებობის პირისთვის ქრთამის შეთავაზება ედებათ ბრალად. მათ აღმკვეთი ღონისძიების სახით პატიმრობა აქვს შეფარდებული. პატიმრობა შეეფარდა, აგრეთვე, იოანის კარდასოპოლუსს, რომელიც მიმალვაშია და მასზე ძებნაა გამოცხადებული.
