ღია გარემოსდაცვითი სამოქალაქო ინიციატივის ინფორმაციით, სტიქიისგან დაზარალებული ოჯახი სოფლის პურის საცხობში ცხოვრობს.
ღია გარემოსდაცვითი სამოქალაქო ინიციატივის განცხადების თანახმად, წლეულს დიდთოვლობამ აჭარის მაღალმთიანეთის ცალკეულ სოფლებს სერიოზული ზიანი მიაყენა.
"20 მარტს ღია გარემოსდაცვითი სამოქალაქო ინიციატივის (OECI) აჭარის რეგიონალური წარმომადგენლობა, ჟურნალისტებთან და ადგილობრივი არასამთავრობო ორგანიზაციის წარმომადგენლებთან ერთად ეწვია ხულოს მუნიციპალიტეტის დიოკნისის თემის სოფელ მანიაკეთს, სადაც 7 თებერვალს ჩამოწოლილმა ზვავმა რაომედიმე ოჯახი მნიშვნელოვნად დააზარალა, მათ შორის განსაკუთრებით აღსანიშნავია ელგუჯა საგინაძის ოჯახი, რომლის საცხოვრებელი სახლი ზვავმა მთლიანად დაანგრია, ხანშიშესული ელგუჯა საგინაძე კი სახლის ნანგრევებში მოყვა. ზვავმა ჩამარხა ასევე ელგუჯა საგინაძის მეუღლეც, რომლის პოვნაც მეზობლებმა სწრაფად მოახერხეს. რაც შეეხება თვითონ ელგუჯა საგინაძეს, დათოვლილი სახლის ნანგრევებიდან მისი ამოყვანა ადგილობრივმა მხოლოდ სამი საათის შემდგომ მოხერხდა. მისი მდგომარეობა მძიმე იყო და სასწრაფოდ გადაყვანილი იქნა ბათუმის საავადმყოფოში, სადაც მკურნალობის თანხები სახელმწიფომ აანაზღაურა, თუმცა საავადმყოფოდან გამოსვლის შემდეგ წამლების შეძენა ოჯახს უკვე თავად უხდება. დაზარალებულის მდგომარება ახლაც მძიმეა, მას უჭირს გადაადგილება, აღენიშნება თავბრუსხვევა და გრძნობს სისუსტეს", - აღნიშნულია განცხადებაში.
OECI - ს ინფორმაციით, ზვავის ჩამოწოლის დროს, საბედნიეროდ, სახლში არ იმყოფებოდნენ შვილი და ფეხმძიმე რძალი.
"ამჟამად საგინაძეების 4 სულიან ოჯახს სოფლის პურის საცხობში, რთულ პირიბებში უწევთ ცხოვრება. სოფლის რწმუნებულის განცხადებით, დაზარალებულ ოჯახს უახლოეს პერიოდში 5 ათას ლარიანი დახმარება გადაეცემა. როგორც ადგილობრივი მოსახლეობა ამბობს, წლეულს განსაკუთრებით დიდი თოვლი მოვიდა, რომლის მსგავსიც უკანასკნელი 30 წლის განმავლობაში არ ყოფილა. უნდა აღინიშნოს, რომ მთის იმ ფერდობზე, საიდანაც ზვავი ჩამოწვა, ტყე გაჩეხილია, წინააღმდეგ შემთხვევაში, ტყეს შეიძლება შეეჩერებინა ზვავის სიძლიერე და სოფლისათვის მიყენებული ზარალიც უმნიშვნელო ყოფილიყო. გაზაფხულზე თოვლის დნობასთან ერთად სტიქიური პროცესები უფრო მეტად გააქტიურდება. სოფელ მანიაკეთის რამოდენიმე ოჯახი სერიოზული რისკის ქვეშ იმყოფება და სახელმწიფოსგან აუცილებელ ყურადღებას საჭიროებს", - იუწყება OECI.