"მონიტორინგის პროცესში გამოიკვეთა, რომ შეზღუდული შესაძლებლობის მქონე ზოგიერთ დაწესებულებაში არსებობენ პრივილეგირებული ბენეფიციარები, რომლებიც ცდილობენ, კონტროლი განახორციელონ სხვა ბენეფიციარებზე", _ ნათქვამია სახალხო დამცველის აპარატის მიერ მონიტორინგის შედეგად დაწერილ ანგარიშში.
სახალხო დამცველის ანგარიშის თანახმად, პრივილეგირებულ ბენეფიციართა არსებობის ხელშემწყობია რთული ქცევის მქონე ბენეფიციარების არსებობა.
"როდესაც პერსონალი ვერ უმკლავდება ბენეფიციარების რთულ ქცევას, "საშველად" გამოკვეთილ "ლიდერ" ბენეფიციარებს იხმობს, რომლებიც ერთგვარი ავტორიტეტით სარგებლობენ დაწესებულებაში მყოფ სხვა ბენეფიციარებს შორის", _ ნათქვამია ანგარიშში.
კერძოდ, დუშეთის ბავშვთა სახლში მონიტორინგის ჯგუფი შეესწრო სიტუაციას, როდესაც უკიდურესად აღგზნებული პაციენტის მდგომარეობის მართვის მიზნით დაწესებულების ადმინისტრაცია დახმარებას სთხოვდა სხვა ბენეფიციარს, ვინაიდან პერსონალის მხრიდან სიტუაციაზე კონტროლის დაკარგვის რისკი არსებობდა.
ერთ-ერთი ბენეფიციარის საცხოვრებელი ოთახი აღჭურვილია კონდინციონერით და მუსიკალური ცენტრით, რაც არ არის ხელმისაწვდომი ყველა ბენეფიციარისთვის.
ანალოგიური სახის ინფორმაცია მიიღო ექსპერტთა ჯგუფმა ძევრის შშმ პირთა პანსიონატის ზოგიერთი ბენეფიციარისგანაც. ერთ-ერთი ბენეფიციარი, მონიტორინგის ჯგუფთან საუბრისას იყო ძალიან დაძაბული, მუდმივად იმეორებდა, რომ მათი წასვლის შემდეგ, სხვა ბენეფიციარები დასჯიდნენ.