სახალხო დამცველის აპარატმა ბავშვთა სახლებში შეზღუდული შესაძლებლობის ნიშნით დისკრიმინაციის ფაქტები გამოავლინა.
"დუშეთის ბავშვთა სახლის მონიტორინგის დროს ხშირად გაისმოდა სტერეოტიპული და შეურაცხმყოფელი ფრაზები ბენეფიციართა გარკვეული ჯგუფის მიმართ, რომელთაც "გიჟებად" მოიხსენიებდნენ", _ ნათქვამია სახალხო დამცველის ანგარიშში.
მონიტორინგის შედეგად, ყურადღება მიიქცია იმ ფაქტმა, რომ სტერეოტიპულ და შეურაცხმყოფელ სახელწოდებებს იყენებს დაწესებულების პერსონალი, რომელთაც მიაჩნიათ, რომ ბენეფიციარები იმდენად განსხვავდებიან ერთმანეთისაგან, რომ მათი დაყოფა ზემოაღნიშნული კატეგორიების მიხედვით შესაძლებელია.
სახალხო დამცველის ანგარიშის თანახმად, ე.წ. "გიჟები" , სხვა ბენეფიციარების მსგავსად, არ მონაწილეობენ გადაწყვეტილებების მიღებაში, მათ არ აქვთ არჩევნის თავისუფლება. ყველა მნიშვნელოვან საკითხს მათ მაგივრად წყვეტს დაწესებულების ადმინისტრაცია სხვა ბენეფიციარებთან, "ჭკვიანებთან" შეთანხმებით.
ბენეფიციართა გადმოცემით, ე.წ. "ჭკვიან" ბენეფიციარებს საშუალება აქვთ, გავიდნენ დაწესებულების გარეთ. ხოლო ე.წ. "გიჟებს" ამის საშუალება არ აქვთ, რადგან პერსონალს მიაჩნია, რომ ისინი "საშიშნი არიან საზოგადოებისთვის".
