საქართველოს დამოუკიდებლობის რეფერენდუმის ჩატარების 20 წლისთავი პარლამენტის ტერიტორიული მთლიანობის აღდგენის საკითხთა დროებითმა კომისიამ აფხაზეთის უმაღლეს საბჭოსთან ერთად აღნიშნა.
დამოუკიდებლობის რეფერენდუმში, რომელიც 1991 წლის 31 მარტს საქართველოს მთელ ტერიტორიაზე, მათ შორის აფხაზეთსა და ცხინვალის რეგიონში ჩატარდა, მონაწილეობა მოსახლეობის 90%-მა მიიღო. აფხაზების მცირე ნაწილმა იმავე წლის 17 მარტს ხმა მისცა საბჭოთა კავშირის ერთიანობის შენარჩუნებას.
"დღეს სწორედ ეს აფხაზები არიან მარიონეტული რეჟიმის გამტარებლები, სწორედ ისინი ცდილობენ, ქართული მიწები გადასცენ რუსეთს, რის სამართლებრივი უფლებაც მათ არ აქვთ", - განაცხადა მალაშხიამ.
სხდომაზე აღინიშნა, რომ რიგ დოკუმენტებში არასწორადაა დაფიქსირებული აფხაზეთში ომამდე მცხოვრები ქართველების რაოდენობა.
უზენაესი საბჭოს თავმჯდომარის მოადგილის, ანზორ წოწონავას თქმით, რეალურად აფხაზეთში 540 ათასი ქართველი ცხოვრობდა და არა 260 ათასი, როგორც ეს დოკუმენტებში, მათ შორის, საერთაშორისო დოკუმენტებშია მითითებული.
მალაშხიას ცნობით, პარლამენტი მუშაობს ინიციატივაზე, რომლის მიხედვით, საქართველოს ყველა დაწესებულებაში, საზოგადოებრივი თავშეყრის ადგილებში, მაღაზიებში, სასტუმროებსა და კვების ობიექტებში გაიცემა ბუკლეტები, რომელშიც ქართულ და ინგლისურ ენაზე დაფიქსირდება ინფორმაცია, რომ საქართველოს ტერიტორიის 20% ოკუპირებულია, დევნილია 400 ათასი, ხოლო მოკლულია 30 ათასი ქართველი.
"ეს უცხოელ სტუმრებს საშუალებას მისცემს, იცოდნენ, როგორ ქვეყანაში იმყოფებიან, რათა ნათელი წარმოდგენა შეექმნათ, რა პირობებში იღვწის საქართველო მოდერნიზებული, ევროპული ტიპის სახელმწიფოდ ჩამოსაყალიბებლად", - განმარტა მალაშხიამ.
მისი განცხადებით, საქართველო უახლოეს პერიოდში დაიბრუნებს ოკუპირებულ ტერიტორიებს და აღადგენს იურისდიქციას მთელ ტერიტორიაზე, ხოლო რუსეთს ჩადენილი დანაშაულის გამო კონტრიბუციის გადახდაც მოუწევს.
"დარწმუნებული ვართ, საერთაშორისო თანამეგობრობა გააგრძელებს საქართველოს მხარდაჭერას დეოკუპაციისა და ევროატლანტიკურ სივრცეში ინტეგრირებისთვის", -განაცხადა მალაშხიამ.