დევნილებს არასათანადოდ მიეწოდებათ ინფორმაცია მათთვის საინტერესო საკითხებთან დაკავშირებით. ამის შესახებ სახალხო დამცველის 2010 წლის ანგარიშშია ნათქვამი. ანგარიშის მიხედვით, უმეტეს შემთხვევაში, დევნილებმა არ იციან არათუ სახელმწიფო სტრატეგიისა და სამოქმედო გეგმის დეტალები, არამედ საერთოდ არ ფლობენ ინფორმაციას ამ დოკუმენტების არსებობის შესახებ. როგორც სახალხო დამცველი მიიჩნევს, ისინი არასაკმარისად არიან ინფორმირებული პრივატიზაციის და რეაბილიტაციის საკითხების, სოციალური დახმარებების, ჯანდაცვის პოლისების შესახებ.
ანგარიშზე დაყრდნობით, სტატისტიკური მონაცემების თანახმად, გამოკითხული დევნილების 40%-ზე მეტი არ არის ინფორმირებული მათთვის განკუთვნილი სამედიცინო მომსახურების შესახებ. პროექტის დამკვირვებლებს ყველაზე ხშირად ინფორმაციას სწორედ აღნიშნულ საკითხებზე სთხოვდნენ.
"დევნილები არ ფლობენ ინფორმაციას თავიანთ უფლებების თაობაზე. მსგავსი სურათი დაფიქსირდა საქართველოს მასშტაბით გამოკითხული თითქმის ყველა დევნილი ოჯახის შემთხვევაში. ინფორმაციის გაცვლის ხარისხი სამინისტროსა და დევნილთა შორის საკმაოდ დაბალია. აღნიშნული იწვევს მიმდინარე საკითხებზე დევნილთა არასწორი შეხედულებისა და არასწორი მოლოდინების გაჩენას. ცხადია, მოცემული მონაცემი მიუთითებს იმაზე, რომ დევნილებს არასათანადოდ მიეწოდებათ ინფორმაცია მათთვის საინტერესო საკითხებთან დაკავშირებით. როგორც უკვე აღინიშნა სამინისტრომ საერთაშორისო ორგანიზაციების აქტიური დახმარებით შექმნა ცხელი ხაზი, ასევე შექმნილია მისაღები, რომელიც დევნილთათვის ინფორმაციის მიწოდებაზეა პასუხისმგებელი. სამწუხაროდ,
როგორც მონიტორინგმა აჩვენა, არსებული მექანიზმები ინფორმაციის ნაკლებობის
პრობლემის გადასაჭრელად არასაკმარისია. შეიქმნა საინფორმაციო ბროშურები
დევნილთა უფლებებისა და სოციალური დახმარებების შესახებ, პრივატიზაციისა და
სარეაბილიტაციო სტანდარტების შესახებ. საჭიროა უფრო ეფექტური ღონისძიებების
გატარება არსებული მდგომარეობის შესაცვლელად", - ნათქვამია ანგარიშში.
