საქართველოში ოჯახში ძალადობის პრევენციის მიზნით წარმართულ საქმიანობას, რომელსაც ფონდი „სოხუმი" გერმანიის ორგანიზაცია EED-ის მხარდაჭერით ანხორციელებს დიდი ბრიტანელი შემფასებელი ჯონ ბიუკლი ეცნობა.
როგორც „ჯი-ეიჩ-ენს" ფონდის ხელმძღვანელმა ალლა გამახარიამ განუცხადა, ჯონ ბიუკლმა უკვე გამართა შეხვედრები პროგრამაში ჩართულ ადამიანებთან. შეხვედრას ესწრებოდნენ ილონკა ბოლტზე (EED-ის პროგრამების ოფიცერი ბალკანეთისა და კავკასიის ქვეყნებში), მაიკლ კრონენბერგი (უფროსი მენეჯერი ფინანსურ საკითხებში) და ლევან აბაშიძე (კონსულტანტი საქართველოში).
„ჯონ ბიუკლი ეცნობა ფონდის საქმიანობას ქალთა მხარდაჭერის ცენტრებში: ქუთაისში, წყალტუბოში, ხონში, ფოთში, სენაკსა და სოფელ ხურჩაში. ხვდება ბენეფიციარებს, ადგილობრივი თვითმმართველობის წარმომადგენლებს, ჟურნალისტებს, არასამთავრობო ორგანიზაციების წევრებს - ყველას, ვისთანაც ფონდი „სოხუმი" თანამშრომლობს", - განაცხადა გამახარიამ.
გამახარიამ აღნიშნა, რომ ფონ¬დი ხელს უწყობს ქვეყანაში თანასწორობის დანერგვას, მუშაობს ქალის როლის ასამაღლებლად ოჯახსა და საზოგადოებაში, პოლიტიკასა და სამშვიდობო საქმეში რვა ქალაქში _ ქუთაისი, წყალტუბო, ხონი, ოზურგეთი, ბათუმი, ზუგდიდი, ხობი და ფოთი.
„კომპლექსური მუშაობა მიმდინარეობს ძალადობის პრევენციის მიზნით. შექმნილია ქალთა მხარდაჭერის ცენტრები ქუთაისში, წყალტუბოში, ხონში, ფოთში, სენაკსა და ხურჩაში. ტარდება ტრენინგები, შეხვედრები იურისტთან, გინეკოლოგთან, ფსიქოლოგთან.. იურისტ-ექსპერტთა ჯგუფი ოჯახში ძალადობის წინააღმდეგ მიმართული კანონის მონიტორინგს ახორციელებს", - აცხადებს გამახარია.
ფონდი „სოხუმი" აფხაზეთიდან დევნილ ქალთა არასამთავრობო ორგანიზაციაა, რომელიც 1997 წელს ქუთაისში დაფუძნდა.
