შრომის, ჯანმრთელობისა და სოციალური დაცვის მინისტრი ანდრია ურუშაძე მზადაა სახალხო დამცველის ანგარიშში ასახულ ყველა ნაკლოვანებაზე რეაგირება მოახდინოს.
"ჩვენ აქტიურად ვთანამშრომლობთ სახალხო დამცველთან და მზად ვართ ყველა ნაკლოვანებებზე რეაგირება მოვახდინოთ", - განუცხადა ურუშაძემ ჟურნალისტებს მთავრობის დღევანდელი სხდომის დაწყების წინ.
ამასთან, მისივე განმატებით, ის სახალხო დამცველის ანგარიშს ჯერ არ გაცნობია და მასზე საფუძვლიან კომენტარს ვერ გააკეთებს, თუმცა ყველაფერი კეთდება იმისთვის, რომ ციხეებში სამედიცინო მომსახურების კუთხით არსებული პრობლემები დროულად მოგვარდეს.
"ციხებში სამედიცინო სერვისების გაუმჯობესების მიმართულებით არსებობს ორი სამინისტროს ერთი შეთანხმებული გეგმა, მათ შორის ტუბერკულოზით დაავადებულთა მკურნალობა. მიმდინარეობს როგორც ინფრასტრუქტურის მშენებლობა, ისე პერსონალის გადამზადება. ვიწყებთ პირველადი ჯანდაცვის სერვისების გაუმჯობესებას. ეს ყველაფერი კეთდება იმისთვის, რომ ციხეებში არსებული პრობლემები გამოსწორდეს", - აღნიშნა ურუშაძემ.
რაც შეეხება შიდსით დაავადებულებისთვის სახელმწიფო პროგრამის შეწყვეტის საკითხს, რაც სახალხო დამცველის ანგარიშში ასევე აისახა, ჯანდაცვის მინისტრი მას კატეგორიულად უარყოფს და აცხადებს, რომ აივ-ვირუსით დაინფიცირებულ ყველა ადამიანს და მათ შორის პატიმრებს, როგორც დიაგნოსტიკასთან, ისე მკურნალობასთან დაკავშირებით პრობლემები არ ექმნებათ.
"საქართველოს შიდსით დაავადებულ ყველა მოქალაქეს, არის ის ციხის პირობებში თუ ციხის გარეთ, უნივერსალური ხელმისაწვდომობა აქვს როგორც დიაგნოსტიკასთან, ისე მკურნალობასთან - მედიკამენტების მიწოდებასთან დაკავშირებით, კიდევ ერთხელ გადავამოწმებ ამ საკითხს, შეიძლება მხოლოდ ტექნიკურ პრობლემას ჰქონდეს ადგილი", - აღნიშნა ურუშაძემ.
შეგახსენებთ, რომ სახალხო დამცველის ანგარიში ცნობილი დღეს გახდება. 600-გვერდიან დოკუმენტი ყველაზე დიდი კრიტიკა სწორედ კალმახელიძის უწყებასა და პენიტენციალურ სისტემაში შექმნილ პრობლემებზე მოდის.
