თბილისი არ გადავა თავის პირობებს მოსკოვთან მოლაპარაკებების დროს, რომლებიც რუსეთის ვაჭრობის მსოფლიო ორგანიზაციაში გაწევრიანებას ეხება. ეს განცხადება საქართველოს პრეზიდენტმა მიხეილ სააკაშვილმა ჟურნალ "Foreign Policy"-ის ბლოგ "The Cable "-სათვის მიცემულ ინტერვიუში გააკეთა.
საქართველოს პრეზიდენტმა აღნიშნა ისიც, რომ საქართველოს თანხმობის მისაღებად ვმო-ში გაწევრიანებისათვის რუსეთს მოუწევს მოქნილობის გამოჩენა და კომპრომისზე წასვლა. სააკაშვილმა გაიხსენა ისიც, რომ, რუსეთი იმედოვნებდა, რომ ამ საკითზე საქართველოს გვერდის ავლით აშშ-სთან მოლაპარაკებას შეძლებდა "გადატვირთვის" ფარგლებში.
"ისინი ეუბნებოდნენ ამერიკელებს: ჩვენ თქვენთან მოვილაპარაკებთ, საქართველო კი პაკეტის ნაწილია. ზოგი რუსისგან გამიგონია, რომ საკმარისია ბაიდენის ერთი ზარი, იმისათვის, რომ სააკაშვილმა "მოკეტოს", _ აცხადებს პრეზიდენტი და აღნიშნავს, რომ "ამერიკელები ამაზე არ წავიდნენ და რუსეთს მკაფიოდ გააგებინეს, რომ მსგავსი მოლაპარაკებები არ იქნება".
სააკაშვილმა აღნიშნა, რომ სწორედ ვაშინგტონის ამგვარი პოზიციის წყალობით მოსკოვს მოუწია მოლაპარაკებების მაგიდასთან დაჯდომა თბილისთან ერთად და ეს უკვე დიდი პროგრესია".
აღსანიშნავია, რომ ამ საკითხთან დაკავშირებით ქართულ-რუსული მოლაპარაკებების პირველი რაუნდი, მარტში შვეიცარიის შუამავლობით ბერნში უკვე გაიმართა. მომდევნო რაუნდი მაისის დასაწყისშია დაგეგმილი. სააკაშვილის თქმით, რუსული მხარის მიერ იმთავითვე წამოყენებული წინადადებები, რომლებიც მხოლოდ ქართული პროდუქციის რუსეთში ექსპორტს ეხებოდა კონსტრუქციული არ არის.
"ზოგი რუსი ამბობდა: ჩვენ დაგრთავთ ნებას მოახდინოთ თქვენი ღვინის ექსპორტი და თქვენ შეიცვალეთ თქვენი პოზიცია. მაგრამ ჩვენ არ დაგვრჩა ღვინო, რომელიც შეიძლება რუსეთში ექსპორტზე შევიტანოთ. ეს არ არის სახელოში დამალული კოზირი", _ აღნიშნა სააკაშვილმა და დასძინა, რომ თბილისი ეცდება მოსკოვთან ურთიერთხელსაყრელ გადაწყვეტილებებს მიაღწიოს საზღვარზე გარიგებების გამჭვირვალეობისა და საბაჟო საკითხებთან მიმართებაში - ეს კი ბევრად უფრო სერიოზულია, ვიდრე ღვინო", _ განაცხადა საქართველოს პრეზიდენტმა.
სტატიაში ასევე აღნიშნულია ისიც, რომ კოლოსალურ პრობლემას წარმოადგენს ის, თუ რა შეიძლება ჩაითვალოს რუსეთ-საქართველოს საზღვრად. თბილისისათვის ეს არის საზღვარი, რომელიც რუსეთს აქვს აფხაზეთთან და ე.წ. სამხრეთ ოსეთთან, რომელთა დამოუკიდებლობაც რუსეთმა 2008 წლის აგვისტოში ცალმხრივად აღიარა.
"ნაბიჯი რუსეთზეა - მან უნდა მოახდინოს იმის დემონსტრირება, რომ მზადაა მოქნილი და კომპრომისული გადაწყვეტილებების მისაღებად", _ განაცხადა საქართველოს პრეზიდენტმა და დასძინა - "რუსებს ეგონათ ამ საკითხის გადაწყვეტას საქართველოს გვერდის ავლით შეძლებდნენ. მე მათ წარმატებას ვუსურვებ! შეეცადონ! საქართველო კი თავის პრინციპებს არ დათმობს".
საქართველოს პრეზიდენტმა ასევე მზადყოფნა გამოთქვა, იმასთან დაკავშირებით, რომ მოლაპარაკებებზე მსჯელობა მხოლოდ ეკონომიკურ საკითხებით შემოიფარგლოს.
"მაგრამ რუსები ყველა ეკონომიკურ საკითხს პოლიტიკურად აქცევენ ხოლმე", _ აცხადებს სააკაშვილი.
