ცენტრალური საარჩევნო კომისია 31 მარტიდან იწყებს სოციალურ ქსელში განსახორციელებელ ფოტოკონკურსს თემაზე: "აირჩიე".
31 მარტიდან 30 აპრილის ჩათვლით კონკურსში მონაწილეობის მიღების მსურველებმა უნდა გამოაგზავნონ ფოტო ნამუშევრები ელ-ფოსტით მისამართზე contest@cec.gov.ge.
ფოტოები გამოქვეყნდება ცესკოს "facebook"-ის პროფილზე "Central Election Commission of Georgia". კონკურსში მონაწილეობა შეეძლება ყველა დაინტერსებულ მოქალაქეს 13 წლის ასაკიდან, გარდა საარჩევნო ადმინისტრაციის წარმომადგენლებისა.
კონკურსანტს უფლება არ აქვს საკონკურსო ფოტოში გამოიყენოს რომელიმე საზოგადო ან პოლიტიკური მოღვაწის სახე. ასევე ნებისმიერი კომერციული სახის პროდუქტი.
პირველ ადგილზე გასული გამარჯვებული დასაჩუქრდება პროფესიული ფოტოაპარატით, ხოლო კომისიის ფავორიტი ფოტოს ავტორი საჩუქრად მიიღებს ფოტოსამყაროს 200 ლარიან დაბეჭდვის ვაუჩერსა და ფოტოაპარატს.
50 საუკეთესო ფოტო გამოიფინება ცენტრალური საარჩევნო კომისიის მედია ცენტრში.
საარჩევნო ადმინისტრაციის წარმომადგენლებს უკონკურსოდ ცესკო აძლევს საშუალებას გამოაგზავნონ ფოტოები საარჩევნო თემატიკაზე. საუკეთესო ნამუშევრები სხვა ფოტოებთან ერთად გამოიფინება ცესკოს შენობაში.
2011 წელს ადმინისტრაცია გეგმავს სამოქალაქო განათლების კუთხით საინტერესო პროექტების განხორციელებას. მსგავსი საქმიანობით ცესკო ხელს შეუწყობს საარჩევნო საკითხებთან დაკავშირებით მოქალაქეების ცნობიერების ამაღლებასა და მათი მხრიდან ადმინისტრაციისადმი ნდობის ხარისხის გაზრდას. სოციალური მედიის გააქტიურება ადმინისტრაციის ერთ-ერთი პრიორიტეტული მიმართულებაა ამ კუთხით.