რუსეთის პრეზიდენტი დიმიტრი მედვედევი აღიარებს, რომ ქვეყანაში საინვესტიციო კლიმატი ძალიან ცუდია.
ამის შესახებ მედვედევმა ეკონომიკის მოდერნიზაციის კომისიასთან შეხვედრაზე განაცხადა და აღნიშნულის მიზეზად კორუფციული გარემო და მაღალი გადასახადები დაასახელა.
გარდა ამისა, რუსეთის პირველმა პირმა მსხვილი სახელმწიფო კომპანიები თანხმების არამიზნობრივად ხარჯვაშიც დაადანაშაულა და აღნიშნულ კონტექსტში გენერალურ პროკურორს კორუფციის წინააღმდეგ საბრძოლველად ახალი მექანიზმების შემუშავება დაავალა.
მედვედევმა უკმაყოფილება ქვეყანაში უცხოული ინვესტიციების სიმცირის გამოც გამოთქვა და ამ კუთხით ფონდის შექმნის ინიციატივით გამოვიდა, რომლის მიზანიც სწორედ პირდაპირი უცხოური ინვესტიციების მოზიდვა იქნება.
"ჩვენ გვჭირდება უცხოელი ინვესტორების ნდობა. რა ვითარება გვაქვს ახლა? სამწუხაროდ, ნდობის დეფიციტს განვიცდით და ამაზე გულახდილად უნდა ვისაუბროთ. ჩემი შეფასებით, ქვეყანაში საინვესტიციო კლიმატი ძალიან ცუდია. სახელმწიფო კომპანიები საქონლის შესყიდვაზე ხარჯავენ გაცილებით მეტს, ვიდრე ჩვენი უცხოელი კონკურენტები. ამას ერთადერთი ახსნა შეიძლება ჰქონდეს და ეს კორუფციაა", - აღნიშნა მედვედევმა.
