სოფლის მეურნეობის მინისტრი ბაკურ კვეზერელი პირობას დებს, რომ მიმდინარე წელს სოფლის მეურნეობის პროგრამებზე 150 მილიონი ლარი დაიხარჯება. ამის შესახებ კვეზერელმა ჟურნალისტებს ოპოზიციის ბრალდებების საპასუხოდ განუცხადა.
"150 მილიონი ლარი ნამდვილად დაიხარჯება. მიმდინარე წელს დაიწყება ამ პროგრამების განხორციელება, მათი უმრავლესობა წელსვე დასრულდება, ხოლო ნაწილი, მათი მასშტაბებიდან გამომდინარე, მომავალი წლის დასაწყისში", - აღნიშნა კვეზერელმა.
მინისტრის შეფასებით, მის მიერ სამთავრობო დებატებზე წარმოდგენილი იყო სოფლის მეურნეობის დარგში მასშტაბური პროექტები და მისთვის გაუგებარია ოპოზიციის პრეტენზიები.
"ოპოზიციონერმა დეპუტატებმა ან ვერ გაიგეს, ან არ უნდოდათ გაგება და ამიტომ არ დაუჭირეს ამ პროგრამებს მხარი", - დასძინა სოფლის მეურნეობის მინისტრმა.
შეგახსენებთ, რომ საპარლამენტო ოპოზიცია ხელისუფლებასა და პრეზიდენტ სააკაშვილს დანაპირების არშესრულებაში ადანაშაულებს. საუბარია სოფლის მეურენეობის სფეროსთვის დამატებით 150 მილიონი ლარის გამოყოფაზე.
2011 წლის სახელმწიფო ბიუჯეტის პროექტის თანახმად, სოფლის მეურნეობის სამინისტროს მხოლოდ 9 მილიონი ლარი ემატება.
