პრემიერ-მინისტრი ნიკა გილაური საპარლამენტო ოპოზიციის მხრიდან ქვეყნის განვითარების "ალტერნატიულ გეგმას" ელოდა, თუმცა "იმედი გაუცრუვდა".
"იმედი მქონდა, რომ ჩვენი ოპონენტები რაიმე ალტერნატიულ გეგმას წარმოადგენდნენ. იმედი მქონდა, რომ ისინი სწორედ ამ გეგმის გარშემო გამართავდნენ დებატებს და იტყოდნენ, თუ რა შეიძლება დამატებით გაკეთდეს გეგმის წინსვლისთვის. აქ ეს ალტერნატიული ვარიანტი ვერ დავინახე", - განაცხადა გილაურმა პარლამენტში, სამთავრობო დებატების ფარგლებში შემაჯამებელი სიტყვით გამოსვლისას.
შეგახსენებთ, რომ პარლამენტში სამთავრობო კვირა "ქრისტიან-დემოკრატების" ინიციატივით შედგა. დეპუტატების შეკითხვებს ეკონომიკურმა გუნდმა, ასევე განათლების, ჯანდაცვის და ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრებმა უპასუხეს. სამთავრობო საათზე იქნა დაბარებული რეგიონალური განვითარებისა და ინფრასტრუქტურის მინისტრი რამაზ ნიკოლეიშვილიც. საერთო ჯამში მთავრობა დეპუტატების შეკითხვებს 40 საათის განმავლობაში პასუხობდა. სამთავრობო კვირა საკანონმდებლო ორგანოში დღეს, სწორედ პრემიერ-მინისტრ ნიკა გილაურის შემაჯამებელი მოხსენებით დაიხურა.
