ოპოზიცია ხელისუფლებისგან ითხოვს პასუხს, თუ რატომ არ ხდება ქუთაისში მერის პირდაპირი წესით არჩევა, მაშინ, როდესაც პარლამენტი ამ ქალაქში გადააქვთ. ეს საკითხი დღეს სესიაზე "საარჩევნო კოდექსში” ცვლილებების შეტანის პროექტის განხილვისას "ქრისტიან-დემოკრატების” წარმომადგენელმა ლევან ვეფხვაძემ დააყენა და აღნიშნულ კითხვაზე პასუხის გაცემა უმრავლეობის წევრს, პავლე კუბლაშვილს მოსთხოვა.
ვეფხვაძის თქმით, ქუთაისი ქვეყნის მეორე დედაქალაქად გამოცხადდა, პარლამენტიც ამ ქალაქში გადადის, თუმცა მოსახლეობას უფლებას არ აძლევენ, ქალაქის მერი თბილისის მსგავსად თავად აირჩიოს.
