"დემოკრატიული მოძრაობა - ერთიანი საქართველო" განცხადებას ავრცელებს. მათი განცხადებით, სრულიად საქართველოს კათალიკოს-პატრიარქის მიმართ უპრეცედენტო და შეურაცხმყოფელი კამპანია გრძელდება.
"2009 წლის 3 დეკემბერს საზოგადოების ერთი ნაწილის სახელით პატრიარქისადმი გავრცელებული მიმართვა არა მხოლოდ საპატრიარქოსა და მისი უწმინდესობის, არამედ მთელი ქართველი ერისა და საქართველოს სახელმწიფოს დისკრედიტაციის მცდელობაა.
ხელისუფლებასთან მჭიდრო კავშირში მყოფი დაჯგუფების გამიზნული ქმედება საზოგადოებაში შუღლისა და დაპირისპირების გაღვივებას, საერთაშორისო საზოგადოების თვალში ჩვენი ქვეყნის ფუნდამენტალისტურ სახელმწიფოდ წარმოჩენას ემსახურება. ეს აქცია პოლიტიკური პროვოკაციის ნიშნებს რომ ატარებს, ეჭვს არ იწვევს. დარწმუნებულნი ვართ, რომ აღნიშნული კამპანიის უკან პირადად საქართველოს პრეზიდენტი მიხეილ სააკაშვილი დგას. ჩვენთვის კარგად არის ცნობილი მისი რეალური დამოკიდებულება ეკლესიისა და პატრიარქისადმი.
დარწმუნებულნი ვართ, პატრიარქის უდიდეს ავტორიტეტს დისკრედიტაციის მსგავსი უსუსური მცდელობა ჩრდილს ვერ მიაყენებს და დასახული მიზანი - საზოგადოების დაპირისპირება - მიღწეული ვერ იქნება", _ ნათქვამია განცხადებაში.
