2013 წლისთვის აღმოსავლეთის პარტნიორობის მონაწილე ქვეყნის დაფინანსება 785 მილიონ ევრომდე გაიზრდება. 2008 წელს ევროკავშირის მთლიანი წლიური დაფინანსება აღმოსავლეთის პარტნიორობის მონაწილე ექვსი ქვეყნისათვის 450 მილიონი ევრო იყო.
დამატებითი დაფინანსების 50% ინსტიტუციონალური მშენებლობის მრავალმხრივ პროგრამებს (დაახლოებით 350 მლნ ევრო, დაიწყება 2010 წელს) მოხმარდება, ხოლო დამატებითი დაფინანსების 20% მოხმარდება რეგიონალურ განვითარებას, რომლებიც გათვლილია რეგიონის ეკონომიკური და სოციალური უთანასწორობის საკითხებზე (დაახლოებით 75 მლნ ევრო, დაიწყება 2012 წელს). 2010-2013 წლებში აღმოსავლეთის პარტნიორობის ინიციატივის განსახორციელებლად გამოყენებული იქნება ყველა არსებული ინსტრუმენტი, რომელიც სამეზობლო პოლიტიკის და პარტნიორობის ინსტრუმენტის ფარგლებში მოქმედებს, კერძოდ, TAIEX, Twinning
და სხვა.
"კავკასიის ეკონომიკური და სოციალური კვლევითი ინსტიტუტის", აღმასრულებელი დირექტორი დავით ნარმანია აცხადებს, რომ აღმოსავლეთის პარტნიორობის ინიციატივის ფარგლებში ევროკავშირმა გამოთქვა მზადყოფნა, პარტნიორებთან ორმხრივი მოლაპარაკებების საფუძველზე შეათანხმოს ასოცირების ხელშეკრულება, რომელიც აღმოსავლეთის პარტნიორობის ინიციატივის ძირითადი ელემენტია.
"აღმოსავლელ პარტნიორებთან ევროკავშირის ურთიერთობის მასშტაბი გაითვალისწინებს იმ ფაქტს, რამდენად აისახება ზემოთ ხსენებული ფასეულობები შესაბამისი ქვეყნების მოღვაწობაში და პოლიტიკის განხორცილებაში. იმ პარტნიორებთან, რომელთაც სურთ და ძალუძთ იკისრონ უფრო ფართო ვალდებულებები ევროკავშირის წინაშე, გაიმართება მოლაპარაკება ამ სახელშეკრულებო ჩარჩოსთან დაკავშირებით, რომელიც უფრო ღრმა ურთიერთობებს განაპირობებს. „უფრო მეტი უფრო მეტისთვის" - აღმოსავლეთის პარტნიორობის პროგრამა შესაძლებლობებს, ასე ვთქვათ, დამსახურების მიხედვით გაანაწილებს. ანუ 6 ქვეყნიდან თითოეული მიიღებს იმდენს, რამდენიც მას პოლიტიკური რეალობისა და რეფორმების შედეგების მიხედვით ეკუთვნის. აღმოსავლეთის პარტნიორობა არ წარმოადგენს გზას ევროკავშირის წევრობისათვის. მის ფარგლებში მიღწეული ეკონომიკური ინტეგრაციის დონე არ იქნება ინდივიდუალური ქვეყნის ევროკავშირში გაწევრიანების შანსების განმსაზღვრელი.აღმოსავლეთ პარტნიორობა არის ევროკავშირის პასუხი აღმოსავლეთ სამეზობლოს ქვეყნებში არსებულ გამოწვევებსა და სურვილებზე. ამ ქვეყნებისთვის დემოკრატიისა და საბაზრო რეფორმების გატარებაში და სახელმწიფოებრიობისა და ტერიტორიული მთლიანობის აღდგენაში დამატებითი, რეალური დახმარების გარდა აღმოსავლეთის პარტნიორობამ უნდა უზრუნველყოს ევროკავშირის მხრიდან მდგრადი სოლიდარობის პოლიტიკური გზავნილი. ეს ხელს შეუწყობს ევროკავშირის და ასევე მთელი კონტინენტის სტაბილურობას, უსაფრთოებას და კეთილდღეობას. აღმოსავლეთის პარტნიორობა განხორციელდება რუსეთთან ევროკავშირის სტრატეგიული პარტნიორობის პარალელურად"- აცხადებს დავით ნარმანია.
აღმოსავლეთის პარტნიორობა არის ევროკავშირის ახალი ინიციატივა მისი მეზობელი ექვსი სახელმწიფოს (საქართველო, აზერბაიჯანი, სასომხეთი, უკრაინა, მოლდოვა და ბელორუსია) მიმართ. აღმოსავლეთის პარტნიორობის ინიციატივა ძალაში შევიდა 2009 წლის 7 მაისს აღმოსავლეთის პარტნიორობის სამიტზე ერთობლივი დეკლარაციის მიღებით.