დღეს, 27 მარტს, რომპეტროლის რალის სეზონი 2011" ვარდების მოედანზე, განსხვავებული ფორმატით, ცნობილი ქართველი ქალების შეჯიბრით გაიხსნება. სალომე ბაკურაძე, ირინა ონაშვილი, თიკო სადუნიშვილი, ალინა არველაძე, ნონო ხაჟომია, სოფო გელოვანი, ლალი ტოტიკაშვილი და საზოგადოებისთვის კარგად ცნობილი სხვა ქალბატონები ძალებს ამჯერად საჭესთან მოსინჯავენ.
„რომპეტროლ საქართველოს" და საავტომობილო ფედერაციის ინიციატივით, სეზონი აქციით „მართე მანქანა მობილურის გარეშე" გაიხსნება და მასში მონაწილეობას მხოლოდ ქალბატონები მიიღებენ.
„მარტი ქალების თვეა, ჩვენც გადავწყვიტეთ გაგვეგრძელებინა მათი დღესასწაულები და კიდევ ერთი ხალისიანი და საინტერესო დღე გვეჩუქებინა. უკვე მეოთხე წელია ავტოსპორტის უცვლელი მხარდამჭერები ვართ, მაგრამ აქცია „მართე მანქანა მობილურის გარეშე" პირველად ჩატარდება. ქალები საჭესთან ხშირად საუბრობენ ტელეფონით და საინტერსოა, როგორ გაართმევენ თავს შეჯიბრს, სადაც მობილურით საუბართან ერთად, გარკვეული სირთულეებიც ექნებათ დასაძლევი. ეჭვი არ მეპარება, რომ აქცია საინტერესოდ ჩაივლის, გამარჯვებულ გუნდს კი პრიზად 2000 ლარი ფულადი პრემია, ხოლო სპეციალურ ნომინაციებში გამარჯვებულებს 100-100 ლიტრი საუკეთესო საწვავი „ეფიქსი" ელის," - აცხადებს „რომპეტროლ საქართველოს" გენერალური დირექტორი ალექსანდრე ალბინი.
შეჯიბრი ესტაფეტის ფორმატში ჩატარდება, ხოლო ყველა ქალბატონი წინასარბოლო ვარჯიშს გაივლის. შაბათს მთელი დღის განმავლობაში შეჯიბრის მონაწილეებს საწვრთნელ ტრენინგს ლისის ტბის შესასვლელთან საავტომობილო ფედერაციის პრეზიდენტი და პროფესიონალი ინსტრუქტორები ჩაუტარებენ.
„კვირას შეჯიბრი 12:00 საათისთვის დაიწყება. მასში მონაწილე ქალბატონები გუნდებად დაიყოფიან და ყველა თანაბარ პირობებში, ერთიდაიმავე ავტომობილით იასპარეზებს. თითოეული ქალბატონი 2 ერთნაირ მარშრუტს გაივლის, თუმცა მეორე წრეზე სირთულე ის იქნება, რომ მოუწევთ ტელეფონზე საუბარი. ღონისძიების წამყვანი მობილური ტელეფონის საშუალებით მათ დამაბნეველ კითხვებს დაუსვამს, ხოლო მაყურებლებს საუბრის მოსმენა და მანქანაში არსებული ვითარებისთვის თვალყურის დევნება, მოედანზე საგანგებოდ დამონტაჟებული „Bang&Olufsen"-ის ბოლო თაობის მონიტორების საშუალებით ექნება. ტელევიზორები ცნობილმა ბრენდმა შეჯიბრისთვის მოგვაწოდა და ასევე დააწესებს ძვირფასს საჩუქარს,"-აცხადებს საავტომობილო ფედერაციის პრეზიდენტი მევლუდ მელაძე.
რაც შეეხება სხვა პრიზებს, სპეციალურად ამ დღისთვის საჩუქარს, საგანგებოდ ქალბატონებისთვის შექმნილ 2 ყველაზე მოდურ მობილურ ტელეფონს კომპანია „ბილაინი" აწესებს. ბილაინის გასახსნელი მობილური ტელეფონი, რომელიც მალე გაყიდვაში გამოვა, მოდური დიზაინით გამოირჩევა და ორ ფერში: ვარდისფერსა და ნაცრისფერშია წარმოდგენილი. დიზაინთან ერთად მას შესანიშნავი ტექნიკური მონაცემები გააჩნია. სადაზღვევო კომპანია „არდი ჯგუფი" მთლიანად ღონისძიებას და მის ყველა მონაწილეს ნებისმიერი გაუთვალისწინებელი შემთხვევისაგან ან ტრავმისაგან დააზღვევს. ამასთან, ყველა ქალბატონს ავტომობილის დაზღვევის შეღავათიან პირობებს შესთავაზებს და სპეციალურ საჩუქარსაც დააწესებს. სხვადასხვა ნომიანციებში გამარჯვებულ ქალბატონებს კიდევ მრავალი პრიზი ელოდებათ. სასტუმრო „ქორთიარდ მერიოტი" საჩუქრად ერთი დღით 5 ვარსკვლავიან ნომერში ცხოვრებას დააწესებს, „ჯი.მარტი" სასაჩუქრე კალათას, „ახალი ნათება" განათების მოდურ აქსესუარს. ღონისძებას გამაგრილებელი სასმელით მთლიანად კომპანია „პეპსი" უზრუნველყოფს. კომპანია „პიარ ოფის ჯი" კი, პრიზებს სპეციალურად იმ ორი გუნდის ქალბატონებისთვის დააწესებს, რომლებიც საპრიზო სამეულში ვერ მოხვდებიან.
„რომპეტროლ საქართველო" ავტოსპორტის მხარდაჭერი 2008 წლიდანაა და უკვე მეოთხედ ყველა სეზონი მის სახელს ატარებს. წლეულს ყვალა შეჯიბრი გასული წლებისგან განსხვავებულ ფორმატში გაიმართება და ავტომოყვარულებს საინტერესო სანახაობებს შესთავაზებს.