ეკონომიკისა და მდგრადი განვითარების მინისტრი ვერა ქობალია ეკონომიკის დარგებიდან ყველაზე დინამიკურად განვითარებად სეგმენტად ტურიზმს ასახელებს. მინისტრის თქმით, ტურიზმის ერთ-ერთი სწრაფად მზარდი და დინამიკური სექტორია.
"ქვეყანაში უცხოური ვიზიტორების რაოდენობა გაიზარდა და 2010 წელს საქართველოში 2 მლნ-ზე მეტი ვიზიტორი შემოვიდა. ვიზიტორების რაოდენობა გაზრდილია 2011 წლის იანვარ-თებერვალშიც. ჩვენთვის ყოველი ვიზიტორი მნიშვნელოვანია, რადგანაც თითოეული ვიზიტორი დღეში საშუალოდ 300 დოლარს ხარჯავს, რაც არის დამატებითი შემოსავალი ქართული ბიზნესისთვის. ზუსტად ანაკლიისა და ქობულეთის ტურისტული ზონების განვითარება ნიშნავს ტურისტული ბიზნესის განვითარებას", - განაცხადა ქობალიამ პარლამენტში სიტყვით გამოსვლისას.
ქობალია აცხადებს, რომ ტურიზმის განვითარება ხელს უწყობს ასევე ეკონომიკის სხვა დარგების განვითარებასაც. მინისტრი აცხადებს, რომ ტურისტული სექტორი სწრაფად მზარდია, რასაც კონკრეტული მაგალითებითაც ასაბუთებს.
"ქალბატონი ნინო რატიანი არის მესტიის მკვიდრი, რომელიც ე. წ. კორპუსში ცხოვრობდა. ერთხელაც მას ეწვია იაპონელი ახალგაზრდა, რომელსაც ძალიან მოეწონა მესტია. ეს ახალგაზდა დაბრუნდა იაპონიაში და ამ იაპონელს შემდგომ მესტიაში სხვა იაპონელი ტურისტები მოჰყვა. შემდგომ ქალბატონმა ნინომ აიღო კრედიტი, იყიდა სახლი, შექმნა 7-ნომრიანი სასტუმრო და დღეს შეძლო USIAD-ის გრანტიც აეღო, რასაც საკუთარი ბიზნესის გაფართოებას მოახმარს. რატიანი გეგმავს ასევე ველოტურების ბიზნესში შესვლასაც", - აცხადებს ქობალია.
ტურიზმზე საუბრისას მინისტრმა აჭარის ტურისტული პოტენციალსაც გაუსვა ხაზი და აღნიშნა, რომ აჭარაში ცნობილი ბრენდების სასტუმროების აშენების შემდგომ, დამატებით 900 სასტუმრო ნომერი გაჩნდება.
"აჭარაში მშენებარე სასტუმრებში დამატებით 900 ნომერი იქმნება, სადაც 2 ათასი ადამიანი დასაქმდება. მნიშვნელოვანია ასევე, რომ კურორტ საირმეში 2013 წლის ბოლომდე 10 მლნ. ლარის ინვესტირება მოხდება. ანაკლიაში მხოლოდ 5 სასტუმროში 400 ადამიანი დასაქმდება", - აცხადებს ქობალია.