ეკონომიკისა და მდგრადი განვითარების მინისტრი აღიარებს, რომ ქვეყანაში მნიშვნელვანი სავაჭრო დეფიციტია. ვერა ქობალიას განმარტებით, მიუხედავად გატარებული რეფორმებისა, ქვეყანა მაინც იმპორტზეა დამოკიდებული.
"საერთაშორისო ბაზრებზე ფასების ზრდა მომენტალურად აისახება ქართულ ბაზარზე და ჩვენი მოქალაქეების სოციალურ მდგომარეობაზე. ამიტომ მნიშვნელოვანია, საწარმოო ბაზის განვითარება და ახალი სამუშაო ადგილების შექმნა", - აცხადებს ქობალია.
მინისტრის თქმით, დიდი ხნის განმავლობაში საქართველოს მთავარ საექსპორტო პროდუქციას ჯართი წარმოადგენდა, თუმცა დღეს ჯართმა საექსპორტო პოზიცია მნიშვნელოვნად დათმო.
"დიდი ხნის განმავლობაში ჩვენი საექსპორტო პროდუქცია იყო ჯართი, მაგრამ 2010 წელს ის მესამე ადგილზე გადავიდა და დღეს ვაწარმოებთ სოლიდური რაოდენობის ალმატურას, რაც ინდური ინვესტიციით ხორციელდება. გაიზარდა ასევე ავეჯის ექსპორტი. სტატისტიკური მონაცემების თანახმად, 2010 წელს ავეჯის ექსპორტი 636 %-ითაა გაზრდილი, სამაგიეროდ შემცირებულია ხე-ტყის ექსპორტი", - აცხადებს ეკონომიკისა და მდგრადი განვითარების მინისტრი.
საექსპორტო პროდუქციის ჩამოთვლისას ქობალია ხაზს ელექტროენერგიის ექსპორტსაც უსვამს. მინისტრის თქმით, მნიშვნელოვანია, რომ საქართველო ელეტრონერგის ექსპორტიორი ქვეყანა გახდა, მაშინ როდესაც რამდენიმე წლის წინ ადგილობრივ ბაზარზე დეფიციტი იყო.
პარლამენტში გამოსვლისას ეკონომიკისა და მდგრადი განვითარების მინისტრმა ხაზი თურქულ ინვესტიციებსაც გაუსვა. მინისტრმა აღნიშნა, რომ თურქული ინვესტიციით საქართველოში ტექსტილის საწარმოები აშენდა, საიდანაც ტექსტილი ევროპის სხვადასხვა ქვეყანაში გადის.
"2010 წელს ქვეყნის საექსპორტო პროდუქციაში იყო ასევე ავტომობილები. ჩვენ ავტომობილებს არ ვაწარმოებთ, მაგრამ ფაქტობრივად უკვე გავხდით ერთგვარი ცენტრი - ჰაბი ავტომობილების რეექსპორტისთვის. დღეისათვის ამ სფეროში 15 ათასი ადამიანია დასაქმებული", - აცხადებს ეკონომიკისა და მდგრადი განვითარების მინისტრი.
