საქართველოს პრემიერ-მინისტრი ნიკოლოზ გილაური ქვეყნის მაკროეკონომიკური პარამეტრებით კმაყოფილი არ არის, თუმცა აცხადებს, რომ მთავრობის მიერ ყველაფერი კეთდება ეკონომიკური კრიზისის დასაძლევად და ინფლაციის დონის შესამცირებლად. გილაურის განცხადებით, ქვეყნის ეკონომიკისთვის მნიშვნელოვანია ის ფაქტორი, რომ საბიუჯეტო დეფიციტი მცირდება.
"მაკროეკონომიკური თვალსაზრისით, ყველაზე მნიშვნელოვანია საბიუჯეტო დეფიციტი. 2009 წელს საბიუჯეტო დეფიციტი 9 %-ზე მაღალი იყო და ეს იყო სწორი მაკროეკონომიკური პოლიტიკა იმიტომ, რომ მაშინ სწორედ ამ 9 %-იანმა მაჩვენებელმა ქვეყნის ეკონომიკის რეცესიიდან გამოყვანაში გადამწყვეტი როლი შეასრულა. საკმაოდ მალე შევძელით 9 %-იანი საბიუჯეტო დეფიციტის შემცირება და დღეისათვის ქვეყნის საბიუჯეტო დეფიციტი 4,3 %-მდეა შემცირებული. თუმცა როცა მაკროეკონომიკურ მაჩვენებლებზე ვსაუბრობთ, აქ ყველაფერი არცთუ ისე კარგადაა. ერთ-ერთი მთავარი პრობლემა, რაც ქვეყანას აწუხებს ეს არის ინფლაცია. ინფლაციაზე გადამწყვეტი როლი საერთაშორისო ბაზრებზე ფასების ზრდამ იქონია. მსოფლიოში ყველა ბაზარზე ფასები საგრძნობლად გაიზარდა, ამან უარყოფითად იმოქმედა საქართველოზე", - განაცხადა პრემიერ-მინისტრმა პარლამენტში სიტყვით გამოსვლისას.
გილაური ამბობს, რომ მესამე და მეოთხე კვარტალში ინფლაცია ერთნიშნა მაჩვენებლამდე შემცირდება.
"საქართველოში სამწლიანი ინფლაცია ჯამში არის 21,9 %-იანი, რუსეთში 34 %-იანი, უკრაინაში 49 %-იანი, ბელორუსში 37 %-იანი, ხოლო სომხეთში 23 % იანი. რეალურად უნდა გითხრათ, რომ მთელ რეგიონში საქართველოში ყველაზე დაბალი ინფლაციაა, რაც ძალიან მკაცრი ფისკალური და მონეტარული პოლიტიკის შედეგია. ჩვენ გვაქვს ღია ეკონომიკა, ჩვენ არ გვაქვს კორუფცია, არ გვაქვს მონოპოლიია. ანუ ეს არის ძირითადი მიზეზი იმისა თუ სხვა მეზობლებთან შედარებით რატომ გვაქვს საქართველოში მცირე ინფლაცია. თუმცა ამით კმაყოფილები ვერ ვიქნებით და არც ვართ. ძალიან კონკრეტულ ნაბიჯებს ვდგამთ ამ მიმართულებით. მნიშვნელოვანია, რომ წელსვე მინიმალური პენსია ქვეყანაში 100 ლარამდე გაიზრდება", - აღნიშნა გილაურმა.
პრემიერ-მინისტრის თქმით, ქვეყანაში სხვადასხვა აგრარული პროგრამა ხორციელდება. გილაური აცხადებს, რომ მიუხედავად ამისა, ამ პროგრამების განხორციელება ინლფაციის შემცირებისთვის გადამწყვეტი ფაქტორი ვერ გახდება.
"თუმცა მინდა ხაზგასმით ავღნიშნო, რომ ეს პროგრამები არ არის საფუძველი იმისა, რომ ინფლაცია არ იქნება. რაც არ უნდა დიდი იყოს საქართველოში ხორბლის მოსავალი ინფლაცია მაინც იქნება. არგენტინა ხორბლის ექსპორტის მხრივ მნიშვნელოვანი ქვეყანაა, თუმცა იქაც კი ინფლაცია არის 20 %-იანი. რუსეთმა ხორბლის ექსპორტი ჩაკეტა, რითაც რუსმა მწარმოებლებმა დაკარგეს ბაზრები და ისნი სხვა ქვეყნებმა აითვისეს. ამით მინდა ვთქვა, რომ ხელოვნური ჩარევები მაკროეკონომიკაში ვერ მოქმედებს. ინფლაციას ვერ შევებრძოლებით ფასების მარჟების დაწესებით, ან იმ პროდუქციის ჩაკეტვით, რომელიც გვაქვს. შესაბამისად სიმინდისა და ხორბლის პროგრამების მიზანი არის ის, რომ უფრო მეტი შემოსავალი დარჩეს საქართველოში, უფრო ნაკლები გავიდეს და მეტი შემოსავალი დარჩეს ქართველ ფერმერს და ქართველ გლეხს", - აღნიშნა გილაურმა.
