ხვალ, 21 მარტს, საქართველოს პრემიერ-მინისტრი ნიკა გილაური წეროვანში ახალ საწარმოს გახნის.
კომპანია "ბერტა" სოფელ წეროვანის მიმდებარე ტერიტორიაზე 2009 წელს დაარსდა. მისი კომპლექსი 2010 წელს აშენდა, წარმოება კი 2011 წლიდან დაიწყო. მასში შედის ხუთი დამოუკიდებელი საწარმო: საპნის, ფხვნილის,შამპუნის, თხევადი სარეცხის, საწმენდი საშუალებებისა და საოჯახო საპნის საწარმოები. "ბერტა" საყოფაცხოვრებო მოხმარებისა და ჰიგიენური საშუალებების პროდუქტების პირველი და უდიდესი მწარმოებელია ამიერკავკასიის რეგიონში.
როგორც საწარმოს გენერალურმა დირექტორმა ვასილ სულხანიშვილმა "ჯი-ეიჩ-ენთან" საუბრისას აღნიშნა, საწარმოში 200-მდე ადამიანია დასაქმებული, მათგან 100-მდე დევნილია, რომელთა საშუალო ანაზღაურებაც 400-500 ლარია.
"ქართული ბაზარი გაჯერებულია იმპორტული პროდუქციით, უამრავი ბრენდია ჩვენს ბაზარზე. ერთი წლის თავზე ქართული ბაზრის 40%-ის დაკავებას ვგეგმავთ. ჩვენი ლოკალურობა და სწორი ლოჯისტიკური სტრატეგია ამის თქმის საშუალებას გვაძლევს", - აღნიშნა ვასილ სულხანიშვილმა.
მისი თქმით, კომპანია "ბერტას" ქართული პროდუქცია ხარისხითა და დაბალი ფასებითაც გამოირჩევა, რითაც ქართული ბაზრის ათვისება არ გაუჭირდებათ.
ქართული ბაზრის გარდა, კომპანია ამიერკავკასიის, კერძოდ, აზერბაიჯანისა და სომხეთის ბაზრების ათვისებასაც გეგმავს. პირველი შეკვეთა კი ესპანეთიდანაც მიიღეს.
მასალის გამოყენების პირობები