"დიდუბის მარკეტის" ექსპლუატაციაში შესვლის ვადები არ შეიცვლება. კომპანიის მენეჯმენტის განცხადებით, ობიექტი გეგმის მიხედვით, უამინდობის მიუხედავად, აპრილში გაიხსნება.
მათი განმარტებით, ამჟამად მიმდინარეობს მოლაპარაკებები როგორც კვების პროდუქტების ძირითად მწარმოებლებთან, ასევე იმპორტიორებთან, რომ საკუთარი პროდუქციის რეალიზაცია საქართველოში ყველაზე შეღავათიან ფასში მოახდინონ. შესაბამისად, მომხმარებელს საშუალება მიეცემა, შეიძინოს პროდუქტი პირველი ხელიდან, ყველაზე შეღავათიან ფასში და ამავე დროს მშვიდად იყოს, ვინაიდან მის მიერ შეძენილი პროდუქცია საერთაშორისო მოთხოვნების შესაბამის პირობებში იყო შენახული.
თანამედროვე სტანდარტების სამაცივრე მეურნეობით აღჭურვილი, საბითუმო სავაჭრო კომპლექსი "დიდუბის მარკეტი" თბილისის ცენტრში მდებარეობს. სამაცივრე მეურნეობა 1500 კვ. მეტრის ფართზეა განთავსებული, თუმცა სრულად დამხმარე ტერიტორია 7000 კვ. მეტრს მოიცავს. სამაცივრე მეურნეობა ცნობილი იტალიური კომპანია "ტექნო ბლოკის" დანადგარებითაა აღჭურვილი.
კომპლექსი გათვლილია როგორც ხორცპროდუქტებისა და თევზის, ასევე ხილ-ბოსტნეულის შენახვაზე და საბითუმო რეალიზაციაზე.
"დიდუბის მარკეტი" "საქინვესტის" შვილობილი კომპანიაა, რომელიც, თავის მხრივ, ჰოლდინგ "საქართველოს ინდუსტრიული ჯგუფის" შემადგენლობაში შედის.