კარლო კოპალიანი "თელავის ღვინის მარანს" ღვინის ყურძნის გარეშე დამზადებაში ადანაშაულებს.
როგორც დღეს გამართულ ბრიფინგზე კოპალიანმა აღნიშნა, "თელავის ღვინის მარანმა" 2010 წლის მოსავლის უსახელაურის ჯიშის ღვინო ისე გამოუშვა, რომ წელს ერთი კილო ყურძენიც კი არ შეუძენია.
"უსახელაურის ჯიშის ყურძენი მხოლოდ ცაგერის რაიონის ოყურეშის თემის სოფლებში ზუბში და ოქიტარაში მოდის და მისი ძირითადი მყიდველი "თელავის ღვინის მარანი" და "ჯივიესი" იყო. თუმცა წელს მათ ერთი კილოგრამი ყურძენიც არ შეუსყიდია და ბაზარზე კი გამოუშვა 2010 წლის მოსავლისგან დამზადებული უსახელაურის ღვინო, რომლის ღირებულებაც 170 ლარია", - აღნიშნა კოპალიანმა.
მისივე თქმით, აღნიშნულზე კომპანიის წარმომადგენლები აცხადებენ, რომ უსახელაურის ჯიშის ვაზი კახეთში გააშენეს და სწორედ მისი მოსავლისგან ჩამოისხა ღვინოც.
"სრული პასუხისმგებლობით ვაცხადებ, რომ ეს ვაზი არა თუ სხვა რეგიონში, თემის სხვა სოფლებშიც კი არ ხარობს. ამიტომ მოვითხოვ ჩატარდეს ღვინის ექსპერტიზა არის თუ არა იგივე კონსისტენციის და თუ დადგინდება, რომ ფალსიფიცირებულია მოხდეს მისი რეალიზაციიდან ამოღება", - აღნიშნა კოპალიანმა და აქვე დასძინა, რომ აღნიშნულ საკითხს სამთავრობო დებატებზე პრემიერ-მინისტრთან და სოფლის მეურნეობის მინისტრის წინაშე დააყენებს.
ამასთან, კოპალიანი მოითხოვს ფაქტით ფინანსთა სამინისტროს საგამოძიებო დეპარტამენტი დაინტერესდეს.
დეპუტატის თქმით, იმ შემთხვევაში თუ გაირკვევა, რომ "თელავის ღვინის მარნის" მიერ ჩამოსხმული უსახელაური მართლაც კახეთში მოყვანილი ყურძნით არის დამზადებული მას სახელი უნდა გადაერქვას და მიეთითოს, რომ ის კახეთის ვენახებიდან არის.