საქართველოს სტატისტიკის ეროვნული სამსახურის ბიზნეს სტატისტიკის სამმართველომ 2010 წლის შედეგების საფუძველზე საწარმოთა (არაფინანსური კორპორაციების სექტორი) წლიური გამოკვლევის საველე სამუშაოები დაიწყო.
"საქსტატის" ინფორმაციით, გამოკვლევას ექვემდებარება ქვეყანაში მოქმედი ყველა მსხვილი საწარმო, ხოლო საშუალო და მცირე საწარმოების გამოკვლევა ხორციელდება შერჩევითი გზით.
აღნიშნული გამოკვლევის შედეგად განხორციელდება საწარმოთა 2010 წლის კვარტალური (წინასწარი) მონაცემების დაზუსტება და მიიღება ბიზნეს სექტორის საქმიანობის ამსახველი ეკონომიკური მაჩვენებლები სხვადასხვა ჭრილში. ესენია: ბრუნვა, პროდუქციის გამოშვება (ფულად და ნატურალურ გამოსახულებებში), დასაქმებულთა და დაქირავებულთა რაოდენობა, საშუალოთვიური ხელფასი, ინვესტიციები ფიქსირებულ აქტივებში, შემოსავლებისა და ხარჯების კლასიფიკაცია, დამატებული ღირებულება
და ა.შ.
აღნიშნული გამოკვლევის შედეგები მაკროეკონომიკური და შრომის სტატისტიკის მაჩვენებლების გაანგარიშების საფუძველს წარმოადგენს.
გამოკვლევის შედეგები გამოქვეყნდება 2011 წლის 15 ოქტომბრამდე.
