დღეს, 17 მარტს, ეროვნული საინვესტიციო სააგენტოს ორგანიზებით, ანაკლიის თავისუფალ ტურისტულ ზონაში, ინვესტორთა მეორე ჯგუფის ვიზიტი განხორციელდება.
ეროვნული საინვესტიციო სააგენტოს ინფორმაციით, ინვესტორთა მეორე ჯგუფი მათ შორის აშშ-ს, თურქეთის, რუსეთის, ინდოეთის წარმომადგენლები, ადგილობრივი მთავრობა და დაინტერესებულები პირები საქართველოდან ანაკლია-განმუხურის ტერიტორიას ეწვევიან. ინვესტორებს თავად მიეცემათ შესაძლებლობა მოინახულონ სასტუმროების მშენებლობისათვის გამოყოფილი მიწები და მიმდებარე ტერიტორია, ადგილი საიდანაც მოხდება მინერალური წყლის მიყვანა ტურისტულ ზონამდე. მოხდება ანაკლია-ზუგდიდის აეროპორტის მშენებლობის მონახულება.
დელეგაცია ეწვევა ბათუმსაც, სადაც დაგეგმილია შეხვედრები აჭარის ადგილობრივი მთავრობის (ეკონომიკისა და Fფინანსთა სამინისტრო), ტურიზმის დეპარტამენტისა და აჭარის საინვესტიციო სააგენტოს წარმომადგენლებთან. ბათუმის ვიზიტის ფარგლებში დაგეგმილია მოკლე ხნით ქობულეთის თავისუფალი ტურისტული ზონის დათვალიერება. დელეგაციის წევრები უკან ბრუნდებიან ბათუმის საერთაშორისო აეროპორტიდან.
„აღსანიშნავია, რომ ეს უკვე ინვესტორთა მეორე ჯგუფის ვიზიტია ანაკლიაში. საკმაოდ დიდია დაინტერესება უცხოელი ინვესტორების მხრიდან, მიმდინარეობს აქტიური მოლაპარაკებები და ინვესტორები უახლოეს მომავალში გეგმავენ უკვე კონკრეტული ინვესტიციების განხორციელებას და სასტუმროების აშენებას." აცხადებს საქართველოს ეროვნული საინვესტიციო სააგენტოს დირექტორი ქეთი ბოჭორიშვილი.