ხვალ, 17 მარტს, 17:00 საათზე საქართველოს პარლამენტის ილია ჭავჭავაძის სახელობის ეროვნული ბიბლიოთეკის საკონფერენციო დარბაზში გაიმართება სამუშაო შეხვედრა თემაზე - "ფისკალური პოლიტიკა და ფისკალური მდგრადობა".

ამერიკის შეერთებული შტატების საერთაშორისო განვითარების სააგენტოს მიერ დაფინანსებული პროექტის "საზოგადოებრივი ფორუმი და დიალოგის" ფარგლებში, შეხვედრის ორგანიზატორები არიან პოლიტიკისა და მართვის კონსალტინგ ჯგუფი - PMCG და საქართველოს საზოგადოებრივ საქმეთა ინსტიტუტი (GIPA). მოხსენებას გააკეთებს ეკონომისტები, ბესიკ ნამჩავაძე და ლაშა ზივზივაძე.

შეხვედრაზე განხილული იქნება საქართველოს ფისკალური (საბიუჯეტო-საგადასახადო) პოლიტიკა 2003-2011 წლებში. მოხსენება ასევე შეეხება არსებული სახელმწიფო ვალის ტვირთს საქართველოს ეკონომიკისათვის და ფისკალური მდგრადობისთვის საზიანო გამოწვევებს 2012-2013 წლებში. მომხსენებლები მოგვაწვდიან რეკომენდაციებს, რომლებიც უნდა გატარდეს ფისკალური მდგრადობის გასაუმჯობესებლად და შესაძლო გამოწვევების საპასუხოდ.

შეხვედრების საბოლოო პროდუქტი (მოხსენება და საბოლოო ანგარიში) დაეგზავნება დისკუსიის ყველა მონაწილეს და სხვა დაინტერესებულ პირს. გარდა ამისა, პრეზენტაცია, მოხსენება და ანგარიში განთავსდება პროექტის ვებ-გვერდზე (www.pfd.ge) და მისაწვდომი იქნება ყველა ინტერნეტმომხმარებლისათვის.