"დიდუბის მარკეტში" რამდენიმე კომპანიის პროდუქცია ექსკლუზიურ ფასად გაიყიდება. კომპანიის ინფორმაციით, ბანანის იმპორტიორ "ფორასთან" მოლაპარაკებები დასრულებულია. მხარეების შეთანხმების საფუძველზე, ადგილობრივ ბაზარზე "ფორას" მიერ შემოტანილი ბანანი ყველაზე იაფად გაიყიდება.
როგორც "დიდუბის მარკეტის" მენეჯმენტში განმარტავენ, ამ ეტაპზე მოლაპარაკებები კომპანია "ახალ პროდუქტთან" მიმდინარეობს, რომ "დიდუბის მარკეტში" პირველ ეტაპზე 26 დასახელების პროდუქცია შეღავათიან ფასად იყოს წარმოდგენილი. მათ შორის: ხიზილალა და 15 დასახელების თევზი, ღორის და ქათმის ხორცპროდუქტები. "ახალი პროდუქტი" მომავალში ასორტიმენტის გაზრდას გეგმავს.
თანამედროვე სტანდარტების სამაცივრე მეურნეობა "დიდუბის მარკეტი" თბილისის ცენტრში მდებარეობს. სამაცივრე მეურნეობა 1500 კვ. მეტრის ფართზეა განთავსებული, თუმცა სრულად დამხმარე ტერიტორია 7000 კვ. მეტრს მოიცავს. სამაცივრე მეურნეობა ცნობილი იტალიური კომპანიის "ტექნო ბლოკი" დანადგარებით არის აღჭურვილი.
მეურნეობა გათვლილია როგორც ხორც-პროდუქტებისა და თევზის, ასევე ხილ-ბოსტნეულის შენახვაზე და საბითუმო რეალიზაციაზე.
"დიდუბის მარკეტი" "საქინვესტის" შვილობილი კომპანიაა, რომელიც თავის მხრივ ჰოლდინგ "საქართველოს ინდუსტრიული ჯგუფის" შემადგენლობაში შედის.
