თბილისსა და რუსთავს შორის სამარშრუტო ტაქსების მოძრაობის დარეგულირების შემდეგ მგზავრობის საფასურის თვითნებურად მომატება აღარ მოხდება. ამის შესახებ ვახტანგ ბალავაძემ რეგიონული პოლიტიკის, თვითმმართველობის და მაღალმთიანი რეგიონების კომიტეტის სხდომაზე "საავტომობილო ტრანსპორტის შესახებ" კანონში ცვლილების შეტანის შესახებ კანონპროექტის პირველი მოსმენით განხილვისას აღნიშნა.
დეპუტატის თქმით, აღნიშნული საკანონმდებლო ინიციატივის მიღების აუცილებლობა ორ თვითმმართველ ქალაქ შორის შიდაგადაზიდვებზე მას შემდეგ გახდა აუცილებელი, რაც სამარშუტო ტაქსებმა მგზავრობის ღირებულების თვითნებურად გაძვირება გადაწყვიტეს.
"ჩვენ შეხვედრა გვქონდა სამარშუტო ტაქსების მძღოლებთან, რომლებმაც მგზავრობისთვის ფასის მომატების მიზეზად საწვავის გაძვირება დაასახელეს, თუმცა გამოთვლის შემდეგ აღმოჩნდა, რომ მგზავრობის საფასური არაადეკვატურად მაღალი იყო", - აღნიშნა ბალავაძემ.
მისი განმარტებით, რუსთავის და თბილისის საკრებულოები ურთიერთშეთანხმებით შიდაგადაზიდვებზე ლიცენზიების გაცემის წესებს დაადგენენ.
ბალავაძის თქმით, დარეგულირდება არა მხოლოდ სატრანსპორტო გადაზიდვები, ასევე დაცული იქნება მოსახლეობის და გადამზიდავების ინტერესებიც.
"კანონის მიღების შემდეგ ყველა სუბიექტს ეცოდინება რა არის მათი ფუნქცია", - აღნიშნა ბალავაძემ და დასძინ, რომ, მძღოლები, რომლებიც ახლა არიან დასაქმებული, უმუშევრად არ დარჩებიან.
როგორც ცნობილია, კანონპროექტი ითვალისწინებს თვითმმართველ ქალაქებში, რომელთა შორის მანძილი 50 კმ-ზე ნაკლებია და მგზავრნაკადი დიდია, მგზავრთა ეფექტიანი მომსახურების მიზნით, რეგულარული საავტომობილო და სამგზავრო გადაყვანის ორგანიზების და მართვის განხორციელებას ქალაქების ადგილობრივი თვითმართველობის ორგანოების მიერ დადებული შეთანხმებების საფუძველზე.
კანონპროექტის ავტორი თვითმმართველობების კომიტეტის თავმჯდომარე ვახტანგ ბალავაძეა.
