სექტემბრიდან აგრარულ უნივერსიტეტში სწავლების ახალი მეთოდები და პროგრამები დაინერგება. უნივერსიტეტის რექტორის მოვალეობის შემსრულებლის, ლაშა გოცირიძის ინფორმაციით, საქართველოს აგრარული უნივერსიტეტი, ევროპული უნივერსიტეტების გამოცდილების გაზიარებას იწყებს.
"თითოეული სექტორი სახელმწიფოსთვის პრიორიტეტულ მიმართულებას წარმოადგენს და წარმოუდგენელია, რომ აგრარულ სექტორში რაიმე წარმატებას მივაღწიოთ, თუ კი აგრარული განათლებაზე და მაღალკვალიფიციური აგრონომების მომზადებაზე არ გამახვილდება ყურადღება. აგრარული უნივერსიტეტი გეგმავს, რომ სექტემბრიდან ახალი სასწავლო პროგრამები დავნერგოთ. ჩვენ გვინდა, რომ გავიზიაროთ ევროპული აგრარული უნივერსიტეტების სასწავლო პროგრამები, გადმოვიტანოთ ისინი და ჩვენთან დავნერგოთ, ასევე ვთარგმნოთ შესაბამისი სახელმძღვანელოები", - აცხადებს აგრარული უნივერსიტეტის რექტორის მოვალეობის შემსრულებელი.
უნივერსიტეტის ხელმძღვანელი მიიჩნევს, რომ განათლების სტანდარტების დანერგვასთან ერთად სათანადო ინფრასტრუქტურის რეაბილიტაციაც მნიშვნელოვანია, თუმცა ამაში კერძო სექტორის დახმარებაცაა საჭირო.
"აგრარული უნივერსიტეტის რეაბილიტაცია არასოდეს არ განხორციელებულა. მას შემდეგ რაც უნივერსიტეტი აშენდა, აუდიტორები და ინფრასტრუქტურა არ შეცვლილა და რეაბილიტაციის მიმართულებით არაფერი არ გაკეთებულა.
უნივერსიტეტის შენობა თავისი აუდიტორიებით დაახლოებით 300 ათასი კვ/მ-ია, ეს არის უზარმაზარი შენობა, რომელსაც რეაბილიტაცია აუცილებლად ჭირდება. ჩვენი ამოცანაა, რომ მის რეაბილიტაციაში ინვესტიცია სახელმწიფოსთან ერთად, კერძო სექტორმაც ჩადოს", - აცხადებს გოცირიძე.
მისი თქმით, კერო სექტორი ინვესტიციების ცადებით დაინტერესებული უნდა იყოს, რადგანაც გრძელვადიან პერსპექტივაში აგრობიზნესი კვალიფიციურ კადრს მიიღებს.
"ეს შეიძლება იყოს ერთობლივი გრძელვადიანი პროექტები და ამ მიმართულებით დაინტერესება შეიძება იყოს აგრარულ სექტორში დასაქმებული ბიზნესმენების მხრიდან. მათ აქვს ინტერესი, რომ ინვესტიცია ჩადონ აგრარულ განათლებაში და აგრარული უნივერსიტეტიდან გამოზრდილი კადრი, შემდგომში აგრობიზნესში და აგრარულ საწარმოებში დასაქმდნენ", - აცხადებს გოცირიძე.
შეგახსენებთ: დღეს მთავრობის სხდომაზე ცნობილი გახდა, რომ მთავრობა კერძო ფონდის დახმარებით აგრარული უნივერსიტეტის რეორგანიზაციას იწყებს. ცნობილია, რომ აგრარული უნივერსიტეტის განვითარებისათვის რამდენიმემილიონიანი ინვესტიცია განხორციელდება. განათლებისა და მეცნიერების მინისტრი ამბობს, რომ სახელმწიფო და ახლად შექმნილი აგრარული მეცნიერებისა და განათების ფონდი აგრარული უნივერისტის რეორგანიზაციისა და განვითარების გეგმებზე შეთანხმდებიან.
"შექმნილია აგრარული მეცნიერებისა და განათების ფონდი და საქართველოს მთავრობამ დამავალა, მოლაპარაკებები დავიწყო ამ ფონდთან. სახელმწიფომ და ფონდმა ერთი კვირის განმავლობაში უნდა შევიმუშაოთ გზები, თუ რა უნდა გაკეთდეს აგრარულ უნივერსიტეტში. ანუ აგრარულ უნივერსიტეტში შედის 12-15 მილიონიანი ინვესტიცია, რათა უნივერსიტეტის ბაზა მთლიანად იყოს შეცვლილი", - განაცხადა დიმიტრი შაშკინმა.
მინისტრი ამბობს, რომ სოფლის მეურნეობის დარგის განვითარებისათვის შესაბამისი კადრების მომზადება მნიშვნელოვანია და ამ მიმართულებით სწავლების ხარისხი მაქსიმალურად უნდა ამაღლდეს.
