მთავრობა სახელმწიფო უნივერსიტეტებს დამატებით ავტონომიას ანიჭებს. როგორც მთავრობის სხდომაზე პრემიერ-მინისტრმა ნიკა გილაურმა განაცხადა, ის ქონება, რომელიც დღემდე სახელმწიფოს ბალანსზე ირიცხებოდა უშუალოდ ცალკეული უნივერსიტეტების ბალანსზე გადავა და მათ მართვასაც სწორედ ეს უნივერსიტეტები განახორციელებენ.
"განათლების სფეროს რეფორმირება ჩვენი ერთ-ერთი უმნიშვნელოვანესი პრიორიტეტია. როდესაც განვიხილავდით უნივერსიტეტების მოწყობის საკითხს ბევრი შეხვერდისა და კონსულტაციის შემდეგ ჩამოვყალიბდით თუ რა ძირითადი პრობლემებია ამ მიმართულებით და როგორ უნდა გახდეს ეფექტური უნივერსიტეტების მართვა. რეგულაციები იცვლება. მთავრობასა და უნივერსიტეტების ურთიერთობაში, რომლის მიხედვითაც ქონება უშუალოდ უნივერსიტეტის განკარგვაში გადადის და მას დამატებითი ავტონომია ენიჭება" - განაცხადა პრემიერ მინისტრმა.
განათლებისა და მენციერების მინისტრის დიმიტრი შაშკინის განმარტებით, მას შემდეგ რაც ქონება ცალკეული უნივერსიტეტების ბალანსზე გადავა შეიქმნება სპეციალური ფონდი, რომლის მიხედვითაც ისინი დამატებითი ინვესტიციების მოზიდვას შეძლებენ.
"უნივერსიტეტებს ვაძლევთ უფრო მეტ ავტონომიას და ის ქონება რომელიც დღემდე სახელმწიფო ბალანსზე იყო მათ მფლობელობაში გადავა რათა შეიქმნას სპეციალური ფონდები, მოვიზიდოთ დამატებითი თანხები და გავზარდოთ განათლების ხარისხი" - განაცხადა განათლებისა და მენციერების მინისტრმა დიმიტრი შაშკინმა.