რამოდენიმე დღეში ბაზარზე რძის პროდუქტების ახალი ბრენდი „ფაქიზო" გამოჩნდება, რომლის რეალიზაციას საწყის ეტაპზე მხოლოდ დასავლეთ საქართველოში მოხდება.
სს „კაუკაზუს აგროდეველოფმენთის" (კად) ინფორმაციით, მისმა შვილობილმა კომპანიამ სს „უნიფარმმა" ფერმის განახლებითი სამუშაოებიდაასრულა. დანადგარის მომწოდებელი შვედური კომპანია DeLaval-ის ინჟინრების ხელმძღვანელობით განხორციელდა საწველი აპარატის მონტაჟი. ასევე წამყვანი ჰოლანდიური კომპანია DSD Stalinrichting-ის ინჟინრების მიერ დაპროექტებული ძროხების სადგომში დამონტაჟდა ამავე კომპანიის მაღალი ხარისხის შიდა მოწყობილობები და თანამედროვე ნაკელ-გამტანი და სავენტილაციო სისტემები. ფერმაში ამჟამად 235 სული ჰოლშტეინის ჯიშის ძროხაა. 64 ძროხის შეძენა მოხდა გასული წლის ნოემბერში ერთ-ერთი მსხვილი ჰოლანდიური საექსპორტო კომპანია Schaap-ისგან.
სს „უნიფარმი" ერთ-ერთი ყველაზე თანამედროვე სარძევე ფერმაა საქართველოში, რომელსაც აქვს წარმოების მთლიანი ჯაჭვი - წარმოება, გადამუშავება და დისტრიბუცია. ფერმაში დამზადებული რძის პროდუქტი გაყიდვაში შევა მარტის ბოლოს და საწყის ეტაპზე პროდუქციის რეალიზაცია მოხდება დასავლეთ საქართველოში ახალი ბრენდის „ფაქიზოს" სახელით.
"მთელი ჩვენი ძალისხმევა მიმართული იყო ევროპული სტანდარტების შესაბამისი ფერმის მშენებლობაზე. ჩვენ დავიქირავეთ ევროპის მოწინავე საწველი აპარატის, სადგომის მოწყობილობების და ძროხების საექსპორტო კომპანიები. განახლებული ფერმა განაპირობებს კომფორტულ და ჰიგიენურ გარემოს, რაც აუცილებელია მაღალი წველადობის და რძის ხარისხისთვის ", განაცხადა რატი მექვაბიშვილმა, კად-ის გენერალურმა დირექტორმა
სს "კაუკაზუს აგროდეველოფმენთის" ინფორმაციით, პროექტის სრული ღირებულება 3 მლნ. ლარია. კომპანიაში აცხადებენ, რომ სადგომი აშენებულია ევროპული სტანდარტების მიხედვით და ყველა იმ დეტალს ითვალისწინებს, რომელსაც გავლენა აქვს ძროხის კეთილდღეობაზე. ჰოლანდიური კომპანიის DSD Stalinrichting -ის ინჟინრებმა სადგომში მაღალი ხარისხის შიდა მოწყობილობები და თანამედროვე ნაკელ-გამტანი და სავენტილაციო სისტემები უკვე დაამონტაჟეს.
"კაუკაზუს აგროდეველოფმენთი" (კად) წარმოადგენს სააქციო საზოგადოებას რომელიც 2008 წლის გაზაფხულზე დაფუძნდა და მის ძირითად საქმიანობას წარმოადგენს ინვესტიციების განხორცილება სოფლის მეურნეობის სექტორში ამიერკავკასიის რეგიონში. კად-ის საინვესტიციო საქმიანობის ძირითად დარგობრივ მიმართულებებს წარმოადგენენ: რძის პროდუქტების წარმოება, მეცხოველეობა, მეფრინველეობა, მეთევზეობა, სასათბურე მეურნეობა და სასაწყობო ინფრასტრუქტურის მშენებლობა.
