ლიბიის ლიდერმა მუამარ კადაფიმ ლიბიის ოპოზიციას "ვირთხები" უწოდა. ქვეყნის დედაქალაქში საკუთარი მომხრეების წინაშე გამოსვლისას მან, ასევე, გამოთქვა მოსაზრება, რომ დასავლეთს ლიბიის ნავთობის მიტაცება სურს.
მისი თქმით, შეტაკებისას ათასი ადამიანის დაღუპვა სიმართლეს არ შეესაბამება. მან დააზუსტა, რომ მხოლოდ ასეულობით ადამიანი დაიღუპა, რომელთა უმეტესობაც ოპოზიციონრები არიან.
ამასთან, ლიბიის ლიდერმა პირობა დადო, რომ ამბოხებულებზე გამარჯვებას უახლოეს ხანში მოიპოვებს. მან კვლავაც უარყო დასავლეთის შეთავაზება, ხელისუფლებისგან ჩამოცილების თაობაზე და თავად მოუწოდა, საფრანგეთის, დიდი ბრიტანეთისა და აშშ-ს ლიდერებს, დატოვონ საკუთარი თანამდებობები, რათა თავის ხალხს ჭეშმარიტი თავისუფლება მიანიჭონ.
თავის მხრივ, აშშ აპირებს ფინანსურად დაეხმაროს კადაფის ოპოზიციას, რისთვისაც თვით მუამარ კადაფის შეჩერებულ აქტივებს გამოიყენებს, რაც 32 მილიარდი დოლარია. როგორც თეთრი სახლის ოფიციალურმა წარმომადგენელმა ჯეი კარნიმ აღნიშნა, ამ ეტაპზე აშშ გაერკვევა საკუთარ უფლებამოსილებაში და მხოლოდ ამის შემდეგ დაეხმარება ოპოზიციონრებს.
ცნობისთვის, ლიბიიდან ნავთობის მოპოვება თითქმის მთლიანად შეწყვეტილია. მაგატეს (საერთაშოროსო ატომური სააგენტო) მონაცემებით, ბუნებრივი ნედლეულის შემცირება ლიბიაში მომხდარმა არეულობამ გამოიწვია, რაც ნავთობის ტერმინალის ახლოს მდებარე ობიექტებთან განხორციელდა.
შეგახსენებთ, ლიბიაში არეულობა უკვე სამი თვეა, გრძელდება, რაც უკვე სამოქალაქო ომშიც გადაიზარდა. ანალიტოკოსები ეჭვობენ, რომ სანამ დასავლეთი ლიბიის ოპოზიციის დასახმარებლად კონკრეტულ ზომებს მიიღებს, კადაფი უკვე მთელ ლიბიაზე აღადგენს კონტროლს.
