საკრებულოს "ქრისტიან-დემოკრატი" წევრის, ჯაბა სამუშიას განცხადებას საკრებულოს უმრავლესობის ერთ-ერთი ლიდერი კოკი იონათამიშვილი გამოეხმაურა. მისი თქმით, კომპანია "ბაზალტი იმპულსთან" თბილისის მერიას კონტრაქტით გათვალისწინებული პირობები შესრულებული აქვს. ამდენად, თუ აღნიშნული კომპანიის თანამშრომლებს ხელფასები არ მიუღიათ, მათ შრომითი უფლებების დასაცავად შესაბამის ორგანოებს უნდა მიმართონ.
"ტენდერები, რომელსაც ქალაქის მერია აცხადებს, არის ელექტრონული, რაც ნიშნავს, რომ იგი მაქსიმალურად გამჭვირვალეა. ის ლოტი, რომელიც ამა თუ იმ კონკურსში მონაწილე ფიზიკურმა თუ იურიდიულმა პირმა გააკეთა, ნებისმიერი თბილისელისთვის მისაწვდომია", _ აღნიშნა იონათამიშვილმა.
მისი თქმით, ამ თემასთან დაკავშირებით კითხვები და ეჭვები უსაფუძვლოა.
შეგახსენებთ, დღეს საკრებულოს "ქრისტიან-დემოკრატმა" წევრმა ჯაბა სამუშიამ ბრიფინგი გამართა. სამუშიას თქმით, დავით აღმაშენებლის გამზირზე მდებარე ჯანსუღ კახიძის სახელობის სკვერის კეთილმოწყობისათვის გამოცხადებულ ტენდერში გამარჯვებულმა კომპანია "ბაზალტი იმპულსმა" მუშებს 3-4 თვის ხელფასი არ გადაუხადა. ამასთან, საკრებულოს წევრი მერიის მიერ ჩატარებულ ტენდერებში გამარჯვებული კომპანიებისათვის გამოყოფილი თანხის მიზნობრივად ხარჯვის შესწავლას საკრებულოს სარევიზიო კომისიისგან ითხოვს.
