დღეს საკრებულოს წინ "ქრისტიან-დემოკრატების წევრმა" ჯაბა სამუშიამ ბრიფინგი გამართა. მისი თქმით, დავით აღმაშენებლის გამზირზე მდებარე ჯანსუღ კახიძის სკვერის კეთილმოწყობისთვის გამოცხადებულ ტენდერში გამარჯვებულმა კომპანიამ "ბაზალტი იმპულსმა" მუშებს 3-4 თვის ხელფასი არ გადაუხადა.
"რეალურად, ტენდერებზე ქალაქში მონიტორინგი არ ხორციელდება. ფაქტია, "ბაზალტი-იმპულსმა" სამი თვეა, ხელფასი არ გადაუხადა მუშებს. მეტიც, ფაქტობრივად, ეს ადამიანები უხელფასოდ დატოვეს და მათ არანაირი პერსპექტივა არ აქვთ. არადა, მერია ვალდებულია, ტენდერის განხორციელებისას მონიტორინგი ჩაატაროს და ამ თანხების მიზნობრიობა გაარკვიოს", _ აღნიშნა სამუშიამ "ჯი-ეიჩ-ენთან" საუბრისას.
სამუშიას თქმით, ასეთი უპასუხისმგებლობის გამო საკრებულოს სარევიზიო კომისია ამ თემით უნდა დაინტერესდეს. მეტიც, საერთოდ, ტენდერების თემით ქალაქის მთავრობა უნდა ინტერესდებოდეს.
სამუშია აცხადებს, რომ საუბარია 85 ათასი ლარის ოდენობით სახელფასო დავალიანებაზე.
"რამდენადაც ჩემთვის ცნობილია, ამ ორგანიზაციას აქვს დავალიანება უკვე სხვა კომპანიების მიმართაც, რომელთაც საშენი მასალა მიაწოდა", _ აღნიშნა სამუშიამ.
მისი ინფორმაციით, ამ კომპანიის მფლობელი აჩიკო გურდულაძეა, რომელმაც ტენდერში გაიმაჯვა და მერიისგან თითქმის 478 ათასი ლარი მიიღო.
