ივნისის ბოლომდე, დონორების მიერ დაპირებული 4,5 მლრდ. დოლარი სრულად იქნება დაკონტრაქტებული, ამის შესახებ ფინანსთა მინისტრის მოადგილემ დიმიტრი გვინდაძემ განაცხადა. გვინდაძის ინფორმაციით, მარტის მდგომარეობით, დონორებთან შეთანხმება მიღწეულია ბრიუსელის კონფერენციაზე დაპირებული ფინანსური რესურსის 90 %-ზე (დაახლოებით 4 მლრდ აშშ დოლარი), რაზეც გაფორმებულია შესაბამისი ხელშეკრულებები სახელმწიფო და კერძო სექტორის პროექტების დასაფინანსებლად. აქედან, სახელმწიფო და კერძო სექტორს უკვე მიღებული აქვს 2 მლრდ აშშ დოლარზე მეტი. დიმიტრი გვინდაძე ამბობს, რომ დარჩენილი თანხა ათვისების პროცესშია და თანხების ჩამორიცხვა პროექტებით გათვალისწინებული სამუშაოების განხორციელების დინამიკიდან გამომდინარეობს.
მინისტრის მოადგილე ამბობს, რომ ბრიუსელის დონორთა კონფერენციის ფარგლებში სახელმწიფო სექტორისთვის ამ ეტაპზე გამოყოფილი რესურსიდან, დაახლოებით 40 პროცენტი წარმოადგენს გრანტს, ხოლო დანარჩენი 60% გამოყოფილია გრძელვადიანი, ხშირ შემთხვევაში შეღავათიანობის მაღალი დონის მქონე სესხების სახით.
მისივე ინფორმაციით, სახელმწიფო სექტორისYთვის გამოყოფილი დახმარება იძულებით გადაადგილებულ პირთა საცხოვრებელი პირობების გაუმჯობესებას, სატრანსპორტო ინფრასტრუქტურის რეაბილიტაციას, ენერგეტიკული ინფრასტრუქტურის განვითარებას, ურბანული და მუნიციპალური ინფრასტრუქტურის რეაბილიტაციას, ბიუჯეტის მხარდაჭერას, სოფლის მეურნეობის და სხვა სექტორების პროექტებს მოხმარდება.
ფინანსთა სამინისტროს ინფორმაციით, დაკონტრაქტებული ფინანსური რესურსების ათვისება შემდეგი 4-5 წლის განმავლობაში გაგრძელდება, რაც ეკონომიკური ზრდის სათანადო ტემპის შენარჩუნებას, დასაქმებასა და სოციალური მდგომარეობის გაუმჯობესებას შეუწყობს ხელს.
გვინდაძე აცხადებს, რომ დონორებთან არსებული მჭიდრო და ნაყოფიერი თანამშრომლობის გათვლისწინებით არსებობს დონორის მზაობა, საქართველოსთვის დამატებითი გრძელვადიანი რესურსის გამოყოფასთან დაკავშირებით, რაც დაახლოებით 5 მლრდ. დოლარამდე გაიზრდება. თუმც დამატებითი რესურსის გამოყოფა ქვეყნის საჭიროების მიხედვით მოხდება.
"საუბარია მსხვილი საინვესტიციო პროექტების განხორციელებაზე. ზოგიერთი პროექტის განხორციელება საკმაოდ დიდ ხარჯებთანაა დაკავშირებული, მაგალითად აღმოსავლეთ-დასავლეთის დერეფნის მშენებლობა. ახლა ვიწყებთ მუშაობას სამტრედია-ქუთაისის-ზესტაფონის შემოვლითი გზის მონაკვეთზე, ასევე იწყება მუშაობა აჭარის შემოვლითი გზის მშენებლობაზე. იმისათვის, რომ ყველა სეგმენტი მოვიცვათ, ამ დროისათვის არ ვიცით თუ რა დაჯდება ზუსტად ასეთი პროექტების განხორციელება. ქვეყნის ეკონომიკური დინამიკიდან გამომდინარე დამატებითი თანხის დაკონტრაქტების საშუალება გვაქვს. ანუ საუბარია დამატებითი თანხის გამოყოფაზე, რაც მიმდინარე, ან დაგეგმილი საინვესტიციო პროექტების განხორციელებას მოხმარდება"- აცხადებს დიმიტრი გვინდაძე.
მინისტრის მოადგილე აცხადებს, რომ ამას ემატება ის დახმარება, რომელსაც დონორები საქართველოში პირდაპირ ახორციელებენ და რომელიც არასახელმწიფო ინსტიტუტების განვითარებას (პირდაპირი ტექნიკური დახმარება, სწავლება, არასამთავრობო სექტორის მხარდაჭერა) ხმარდება.
შეგახსენებთ, რომ რამდენიმე დღის უკან დონორების მიერ გამოყოფილი თანხების საზოგადოებისთვის ანგარიშის ჩაბარების შესახებ პრემიერ-მინისტრმა ფინანსთა სამინისტროს დაავალა.
2008 წლის 22 ოქტომბერს ბრიუსელში გამართულ დონორთა საერთაშორისო კონფერენციაზე, საერთაშორისო საზოგადოება საქართველოს 4,5 მლრდ აშშ დოლარის დახმარების გამოყოფას დაპირდა.