როგორც „ჯი-ეიჩ-ენს" სემეკიდან აცნობეს, 2010 წლის განმავლობაში სამსახურმა მიიღო 626 მოქალაქის განცხადება. აქედან 423 განცხადება შეეხებოდა ელექტროენერგიის, 127 ბუნებრივი გაზის, ხოლო 76 წყალმომარაგების საკითხებს (დიაგრამა #1). სამსახურმა განიხილა 568 განცხადება და სათანადო დახმარება აღმოუჩინა 327 მომხმარებელს. გარდა ამისა, სამსახურმა სხვადასხვა სახის კონსულტაცია გაუწია იმ მოქალაქეებს, რომლებიც ტელეფონისა და ინტერნეტის საშუალებით დაუკავშირდნენ აღნიშნულ სამსახურს.

საზოგადოებრივი დამცველის მიმართვის საფუძველზე 2010 წლის პირველ ნახევარში საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ მომხმარებელთა სასარგებლოდ მიიღო 24 გადაწყვეტილება. არ დაკმაყოფილდა მომხმარებელთა ინტერესების საზოგადოებრივი დამცველის 2 განცხადება და მიღებულ იქნა 2 უარყოფითი გადაწყვეტილება. შეწყდა კოლექტიური განცხადების განხილვა, რადგან ადმინისტრაციული წარმოების პროცესში მომხმარებელებსა და კომპანიას შორის მიღწეული იქნა შეთანხმება, მომხმარებლებს მოეხსნათ უსაფუძვლოდ დარიცხული თანხები, განხორციელდა მათი ინდივიდუალური გამრიცხველიანება და დაკვირვების საფუძველზე განისაზღვრა მომხმარებლების მიერ გადასახდელი თანხები.

სამსახურში შემოსულ განცხადებათა უმეტესობა ეხება ელექტროენერგიის, ბუნებრივი გაზისა და წყალმომარაგების სექტორში მოქმედი კომპანიების მხრიდან მომხმარებლებისათვის უხარისხო ან არასათანადო ხარისხის მქონე პროდუქციის მიწოდებას, გადასახადების არასწორად დარიცხვას და მომსახურების უკანონოდ შეწყვეტას, რაც უკანასკნელ პერიოდში არართხელ გახდა კომისიის მსჯელობის საგანი.

ელექტროენერგიისა და ბუნებრივი გაზის მომხმარებელთა უფლებების დაცვის მიზნით საზოგადოებრივი დამცველის სამსახურმა მონაწილეობა მიიღო 23 სასამართლო პროცესში. დადებითად გადაწყდა 15 საქმე. ნაწილობრივ დაკმაყოფილდა 3 საქმე და არ დაკმაყოფილდა 5 საქმე. საზოგადოებრივი დამცველის თანაშემწეებმა 8 მოქალაქეს გაუწიეს წარმომადგენლობა სასამართლოში და ამდენივე მოქალაქეს აღმოუჩინეს დახმარება სარჩელისა და შესაგებლის შედგენაში.