სადაზღვევო კომპანია „არდი ჯგუფი" ქართულ სადაზღვევო კომპანიებს აგროდაზღვევის მიმართულებით გააქტიურებისკენ მოუწოდებს.
როგორც "არდი ჯგუფის" გენერალური დირექტორი არმაზ თავაზე აცხადებს, ფერმერებისა და გლეხური მეურნეობების დაზღვევა გაზაფხულიდანვე უნდა მოხდეს, რათა აგროსექტორის სტიმულირებისა და მხარდაჭერის პროგრამა სრულყოფილად განხორციელდეს. თუ ლიდერი სადაზღვევო კომპანიები დაინტერესებას გამოთქვამენ ამ მიმართულებით, სოფლის მეურნეობის რეალური განვითარებისთვის მეტი საშუალებები გაჩნდება.
„თუ ჩვენ გვსურს სოფლის მეურნეობა ერთ-ერთ წამყვან დარგად იქცეს ქვეყანაში, მხოლოდ მთავრობის ძალისხმევა საკმარისი არ იქნება. „აგროდაზღვევა" საქართველოში ყველაზე მოთხოვნადი და აუთვისებელი სფეროა, რომელიც ძალზედ ნელი ტემპებით ვითარდება. დარწმუნებული ვარ, პრეზიდენტის განცხადებების შემდეგ ლიდერი სადაზღვევო კომპანიები ამ სფეროში უფრო გაბედულად შემოვლენ.
გასული წლის ბოლოს, როდესაც ჩვენმა ახლადაარსებულმა კომპანიამ აგროდაზღვევის სფეროში პირველი ნაბიჯები გადადგა, ბევრმა ეს ზედმეტად თამამ ნაბიჯად ჩათვალა. რეალურად, ეს მართლაც ერთ-ერთი ყველაზე მაღალი რისკის სფეროა, თუმცა ჩვენ მხოლოდ ერთ თვეში შევძელით არა მხოლოდ აგროდაზღვევის შესაბამისი პროდუქტის შემუშავება, არამედ კონკრეტული შეთავაზებების გაკეთებაც," - აცხადებს სადაზღვევო კომპანია „არდი ჯგუფის" გენერალური დირექტორი არმაზ თავაძე.
მენეჯმენტის ცნობით, კომპანია „არდი ჯგუფს" გურჯაანისა და საგარეჯოს რაიონებში დაზღვეული აქვს დაახლოებით 16 ჰექტრამდე საფერმერო მიწის ნაკვეთები, ახორციელებს დავით გარეჯის დედათა მონასტრის ფონდის მიწების დაზღვევას და მისი პროდუქტებით უკვე 7 ფერმერი სარგებლობს.
"არდი ჯგუფი" ჯერ პატარა კომპანიაა, ამიტომ, რაც გაკეთდა, ზღვაში წვეთია. კარგია, თუ სხვა სადაზღვევო კომპანიები მეტ დაინტერესებას გამოთქვამენ ამ მიმართულებით. გასაგებია, რომ აგროდაზღვევა მომგებიანი ძალიან დიდ ხანს ვერ იქნება საქართველოში, მაგრამ თუ გვინდა აგრარული ქვეყნის სტატუსი რეალურად გვქონდეს, დაზღვევის გარეშე ჩვენი ფერმერები ფონს ვერ გავლენ,"- აცხადებს არმაზ თავაძე.